jo biti hai jo bitegi sab afsane lage hum ko

jo biitī hai jo bītegī sab afsāne lage ham ko

use dekhā to apne ḳhvāb hī sachche lage ham ko

unheñ dekhā to jaise par-shikasta koī taa.ir ho

vo apnī Daar se bichhḌe thake haare lage ham ko

bahut nārāz the ḳhud se kisī se kuchh nahīñ bole

vo ik kone meñ yuuñ baiThe hue achchhe lage ham ko

samajhte hī na the samjhāyā un ko rāsta dil kā

ka.ī naqshoñ ko phailāyā ka.ī ghanTe lage ham ko

vahī afsāne duniyā ke ab un se ham ko kyā lenā

kabhī uktā ga.e un se kabhī achchhe lage ham ko

zarā haT kar jo apne-āp ko kuchh duur se dekhā

to jin bātoñ pe itnā ro.e the qisse lage ham ko

unheñ duniyā kā aisā moh socho to hañsī aa.e

vo sattar saal ke hoñge magar bachche lage ham ko

bachā kar laa.e is tanhā.ī ko ham bhiiḌ se 'mus.haf'

phir ik rickshe meñ baiThe aur baḌe dhakke lage ham ko

jo biti hai jo bitegi sab afsane lage hum ko

use dekha to apne KHwab hi sachche lage hum ko

unhen dekha to jaise par-shikasta koi tair ho

wo apni Dar se bichhDe thake haare lage hum ko

bahut naraaz the KHud se kisi se kuchh nahin bole

wo ek kone mein yun baiThe hue achchhe lage hum ko

samajhte hi na the samjhaya un ko rasta dil ka

kai naqshon ko phailaya kai ghanTe lage hum ko

wahi afsane duniya ke ab un se hum ko kya lena

kabhi ukta gae un se kabhi achchhe lage hum ko

zara haT kar jo apne-ap ko kuchh dur se dekha

to jin baaton pe itna roe the qisse lage hum ko

unhen duniya ka aisa moh socho to hansi aae

wo sattar sal ke honge magar bachche lage hum ko

bacha kar lae is tanhai ko hum bhiD se 'mushaf'

phir ek rickshe mein baiThe aur baDe dhakke lage hum ko