jo but hai yahan apni ja ek hi hai

jo but hai yahāñ apnī jā ek hī hai

duī chhoḌ bande ḳhudā ek hī hai

ye gul khil rahā hai vo murjhā rahā hai

asar do tarah ke havā ek hī hai

haiñ apnī hī niyyat ke phal talḳh-o-shīrīñ

vagarna maza dard kā ek hī hai

bhare rañg jitne badaltā zamāna

magar ishq kā mājrā ek hī hai

sabhī shikve miTte haiñ chashm-e-karam se

maraz hoñ hazāroñ davā ek hī hai

do-rañgī-e-duniyā se kyā kaam ham ko

ki firdaus-e-dil kī fazā ek hī hai

banāte haiñ be-ḳhud sabhī husn vaale

Thikāne alag rāsta ek hī hai

koī samjhe naġhma koī samjhe naala

mire sāz-e-dil kī sadā ek hī hai

vo dār-o-rasan hoñ ki hoñ zahr-o-ḳhanjar

bahāne hazāroñ qazā ek hī hai

mohabbat kare aur ho be-ġharaz bhī

lo phir 'ārzū' aap kā ek hī hai

jo but hai yahan apni ja ek hi hai

dui chhoD bande KHuda ek hi hai

ye gul khil raha hai wo murjha raha hai

asar do tarah ke hawa ek hi hai

hain apni hi niyyat ke phal talKH-o-shirin

wagarna maza dard ka ek hi hai

bhare rang jitne badalta zamana

magar ishq ka majra ek hi hai

sabhi shikwe miTte hain chashm-e-karam se

maraz hon hazaron dawa ek hi hai

do-rangi-e-duniya se kya kaam hum ko

ki firdaus-e-dil ki faza ek hi hai

banate hain be-KHud sabhi husn wale

Thikane alag rasta ek hi hai

koi samjhe naghma koi samjhe nala

mere saz-e-dil ki sada ek hi hai

wo dar-o-rasan hon ki hon zahr-o-KHanjar

bahane hazaron qaza ek hi hai

mohabbat kare aur ho be-gharaz bhi

lo phir 'arzu' aap ka ek hi hai