jo chahiye tha wo na mila aasman se

jo chāhiye thā vo na milā āsmān se

Thukrā ke lauT aa.e sitāroñ ko shaan se

ye soch kar ke chhāñv meñ baiThā na maiñ kabhī

TuuTe na hausla tirā merī thakān se

talvoñ ko chāTne se har ik kaam ban paḌā

mehnat na de sakī vo jo paayā zabān se

lekin vo zaḳhm bhar gayā dahshat nahīñ ga.ī

sab shab aane lagtā hai us ke nishān se

ham se zarā sā aage agar ho bhī tum to kyā

ham apne aap se bane tum ḳhāndān se

lauTā jo ḳhālī haath to maiñ muskurā diyā

ummīd bhī nahīñ thī tere āstān se

ai dil tū rāh-e-ishq kī Thokar se le sabaq

jo ho gayā so ho gayā ā.inda dhyān se

sar se bhaTak rahā hai tumhārā har ek lafz

dil kyā sunegā jo na sunā jaa.e kaan se

jo chahiye tha wo na mila aasman se

Thukra ke lauT aae sitaron ko shan se

ye soch kar ke chhanw mein baiTha na main kabhi

TuTe na hausla tera meri thakan se

talwon ko chaTne se har ek kaam ban paDa

mehnat na de saki wo jo paya zaban se

lekin wo zaKHm bhar gaya dahshat nahin gai

sab shab aane lagta hai us ke nishan se

hum se zara sa aage agar ho bhi tum to kya

hum apne aap se bane tum KHandan se

lauTa jo KHali hath to main muskura diya

ummid bhi nahin thi tere aastan se

ai dil tu rah-e-ishq ki Thokar se le sabaq

jo ho gaya so ho gaya aainda dhyan se

sar se bhaTak raha hai tumhaara har ek lafz

dil kya sunega jo na suna jae kan se