jo chahti thi ye pagal hawa na hone diya

jo chāhtī thī ye pāgal havā na hone diyā

kabhī charāġh ko lau se judā na hone diyā

jo ek shaḳhs zamāne meñ thā aziiz mujhe

use bhī us kī anā ne mirā na hone diyā

ye dil hai terī amānat so aaj tak ham ne

udāsiyoñ meñ ise mubtalā na hone diyā

ta'alluqāt kā vo phuul kab kā suukh chukā

par us kī ḳhushbū ko dil se judā na hone diyā

ai ishq ham ko pata hai ki is zamāne ne

jo ham pe farz thā terā adā na hone diyā

ajab hai maut kā ye ḳhauf umr-bhar jis ne

ki zindagī se mirā rābta na hone diyā

banā ke apnā miTāyā mire vajūd ko yuuñ

ki us ne ḳhud se mirā sāmnā na hone diyā

jo chahti thi ye pagal hawa na hone diya

kabhi charagh ko lau se juda na hone diya

jo ek shaKHs zamane mein tha aziz mujhe

use bhi us ki ana ne mera na hone diya

ye dil hai teri amanat so aaj tak hum ne

udasiyon mein ise mubtala na hone diya

ta'alluqat ka wo phul kab ka sukh chuka

par us ki KHushbu ko dil se juda na hone diya

ai ishq hum ko pata hai ki is zamane ne

jo hum pe farz tha tera ada na hone diya

ajab hai maut ka ye KHauf umr-bhar jis ne

ki zindagi se mera rabta na hone diya

bana ke apna miTaya mere wajud ko yun

ki us ne KHud se mera samna na hone diya