jo chaak hain dil ke zaKHmon mein sine hi paDe to si lenge

jo chaak haiñ dil ke zaḳhmoñ meñ siine hī paḌe to sī leñge

duniyā meñ hameñ jab jiinā hai jis haal meñ hoñge jī leñge

āzār-e-mohabbat kā darmāñ kyā hogā nāseh bātoñ se

ham talḳh nasīhat sun leñge ham zahr ke sāġhar pī leñge

vo hashr-ba-dāmāñ haiñ to kyā ham zulm-o-sitam ko sahte haiñ

jab un kā ho kar jiinā hai jis tarh bhī hogā jī leñge

hai terā ye manshā ai zālim har zulm saheñ aur kuchh na kaheñ

ham terī ḳhātir dushman-e-jāñ umDe hue aañsū pī leñge

un shoḳh nigāhoñ ke sadqe kyā tiir pe tiir baraste haiñ

vo ham ko 'sahāfī' dekhā kareñ ham tīroñ meñ bhī jī leñge

jo chaak hain dil ke zaKHmon mein sine hi paDe to si lenge

duniya mein hamein jab jina hai jis haal mein honge ji lenge

aazar-e-mohabbat ka darman kya hoga naseh baaton se

hum talKH nasihat sun lenge hum zahr ke saghar pi lenge

wo hashr-ba-daman hain to kya hum zulm-o-sitam ko sahte hain

jab un ka ho kar jina hai jis tarh bhi hoga ji lenge

hai tera ye mansha ai zalim har zulm sahen aur kuchh na kahen

hum teri KHatir dushman-e-jaan umDe hue aansu pi lenge

un shoKH nigahon ke sadqe kya tir pe tir baraste hain

wo hum ko 'sahafi' dekha karen hum tiron mein bhi ji lenge