jo chala aata hai KHwabon ki taraf-dari ko

jo chalā aatā hai ḳhvāboñ kī taraf-dārī ko

us ne dekhā hī nahīñ ālam-e-be-zārī ko

pairahan chaak na ho jaa.e mire ḳhvāboñ kā

koī tabdīl kare rasm-e-azādārī ko

chāragar jab tujhe ehsās nahīñ hai to phir

kaun samjhe bhalā bīmār kī bīmārī ko

maiñ ne sochā thā jo bikne se bachā leñge mujhe

dauḌ kar aa.e vahī merī ḳharīdārī ko

ālam-e-ḳhvāb meñ hai jis kī hukūmat yaaro

vo samajhtā hai baġhāvat mirī bedārī ko

dil ke sahrā ko samundar se bachā le maulā

is qadar sahl na kar tū mirī dushvārī ko

kitne bhole haiñ tirī bazm meñ baiThe hue log

sach samajhte haiñ sabhī terī adākārī ko

jo chala aata hai KHwabon ki taraf-dari ko

us ne dekha hi nahin aalam-e-be-zari ko

pairahan chaak na ho jae mere KHwabon ka

koi tabdil kare rasm-e-azadari ko

chaaragar jab tujhe ehsas nahin hai to phir

kaun samjhe bhala bimar ki bimari ko

main ne socha tha jo bikne se bacha lenge mujhe

dauD kar aae wahi meri KHaridari ko

aalam-e-KHwab mein hai jis ki hukumat yaro

wo samajhta hai baghawat meri bedari ko

dil ke sahra ko samundar se bacha le maula

is qadar sahl na kar tu meri dushwari ko

kitne bhole hain teri bazm mein baiThe hue log

sach samajhte hain sabhi teri adakari ko