jo chup rahun to bataen wo ghungniyan munh mein

jo chup rahūñ to batā.eñ vo ghuñgniyāñ muñh meñ

jo kuchh kahūñ to kaheñ qaiñchī hai zabāñ muñh meñ

ye ek baat hai qāsid jo bhejtā huuñ tujhe

vagarna dil meñ jo un ke hai vo yahāñ muñh meñ

zamīñ kā kar diyā paivand ham ko ai zālim!

na ab bhī ḳhaak paḌe tere āsmāñ muñh meñ

na kaan rakh ke kisī ne sunī hazār afsos

tamām umr rahī ġham kī dāstāñ muñh meñ

vo aise bigḌe hue haiñ ki daañt pīste haiñ

ham aise chup haiñ ki goyā nahīñ zabāñ muñh meñ

ye baat kyā hai jo hoñToñ meñ baḌbaḌāte ho

kaho na shauq se jo aa.e merī jaañ muñh meñ

Daro asar se ḳhudā jaane kyā ho kyā kuchh ho

ghuTā huā hai abhī aah kā dhuāñ muñh meñ

kabhī girāne na do aañsū haal par mere

lo aao paanī to Tapkāo merī jaañ muñh meñ

zabān par hai ye kis kis kī tazkira apnā

paḌī hai baat na merī kahāñ kahāñ muñh meñ

phir aise va.ade se taskīñ ho kis tarah merī

''nahīñ'' hai dil meñ tumhāre agar hai ''hāñ'' muñh meñ

usī kā dhyān hai jab tak ki tan meñ jaañ hai 'nizām'

usī kā zikr hai jab tak ki hai zabāñ muñh meñ

jo chup rahun to bataen wo ghungniyan munh mein

jo kuchh kahun to kahen qainchi hai zaban munh mein

ye ek baat hai qasid jo bhejta hun tujhe

wagarna dil mein jo un ke hai wo yahan munh mein

zamin ka kar diya paiwand hum ko ai zalim!

na ab bhi KHak paDe tere aasman munh mein

na kan rakh ke kisi ne suni hazar afsos

tamam umr rahi gham ki dastan munh mein

wo aise bigDe hue hain ki dant piste hain

hum aise chup hain ki goya nahin zaban munh mein

ye baat kya hai jo honTon mein baDbaDate ho

kaho na shauq se jo aae meri jaan munh mein

Daro asar se KHuda jaane kya ho kya kuchh ho

ghuTa hua hai abhi aah ka dhuan munh mein

kabhi girane na do aansu haal par mere

lo aao pani to Tapkao meri jaan munh mein

zaban par hai ye kis kis ki tazkira apna

paDi hai baat na meri kahan kahan munh mein

phir aise wade se taskin ho kis tarah meri

nahin hai dil mein tumhaare agar hai han munh mein

usi ka dhyan hai jab tak ki tan mein jaan hai 'nizam'

usi ka zikr hai jab tak ki hai zaban munh mein