jo dagh hai ishq-e-dil-nashin ka jo dil-nashin hain dil-e-hazin ka

jo daaġh hai ishq-e-dil-nashīñ kā jo dil-nashīñ haiñ dil-e-hazīñ kā

vahī hai tamġha mirī jabīñ kā vahī sulaimāñ mire nagīñ kā

ga.ī na mar kar bhī kīna-ḳhvāhī milā ke miTTī meñ kī tabāhī

mirī tarah se kahīñ ilāhī falak bhī paivand ho zamīñ kā

taḌap na pūchho dil-e-hazīñ kī kahūñ maiñ tum se kahāñ kahāñ kī

usī se hai gardish āsmāñ kī usī se hai zalzala zamīñ kā

jahān sar par uThā rahā huuñ junūñ meñ dhūmeñ machā rahā huuñ

jo dasht meñ ḳhaak uḌā rahā huuñ dimāġh gurdoñ pe hai zamīñ kā

karam meñ ham ko ġhazab meñ ham ko kiyā jo mumtāz sab meñ ham ko

tumhārī dushnām-o-lab meñ ham ko maza milā zahr-o-añgbīñ kā

ye lāġharī ab hai ḳhār-e-dāman ki uTh nahīñ saktā bār-e-dāman

jo paañv apnā hai tār-e-dāman to haath hai taar āstīñ kā

miyān-e-mahshar malālatoñ se maiñ sham.a huuñ dil kī hālatoñ se

ki paañv tak sau ḳhijālatoñ se araq bahā hai mirī jabīñ kā

suḳhan ko 'qadr' auj de zabāñ se ki tuḳhm-e-afshāñ ho lā-makāñ se

kiyā hai 'nāsiḳh' ne āsmāñ se buland-tar rutba is zamīñ kā

jo dagh hai ishq-e-dil-nashin ka jo dil-nashin hain dil-e-hazin ka

wahi hai tamgha meri jabin ka wahi sulaiman mere nagin ka

gai na mar kar bhi kina-KHwahi mila ke miTTi mein ki tabahi

meri tarah se kahin ilahi falak bhi paiwand ho zamin ka

taDap na puchho dil-e-hazin ki kahun main tum se kahan kahan ki

usi se hai gardish aasman ki usi se hai zalzala zamin ka

jahan sar par uTha raha hun junun mein dhumen macha raha hun

jo dasht mein KHak uDa raha hun dimagh gurdon pe hai zamin ka

karam mein hum ko ghazab mein hum ko kiya jo mumtaz sab mein hum ko

tumhaari dushnam-o-lab mein hum ko maza mila zahr-o-angbin ka

ye laghari ab hai KHar-e-daman ki uTh nahin sakta bar-e-daman

jo panw apna hai tar-e-daman to hath hai tar aastin ka

miyan-e-mahshar malalaton se main shama hun dil ki haalaton se

ki panw tak sau KHijalaton se araq baha hai meri jabin ka

suKHan ko 'qadr' auj de zaban se ki tuKHm-e-afshan ho la-makan se

kiya hai 'nasiKH' ne aasman se buland-tar rutba is zamin ka