jo dil-awez hai us zulf-e-girah-gir ki bu

jo dil-āvez hai us zulf-e-girah-gīr kī bū

aisī aalam meñ kisī kī nahīñ tāsīr kī bū

ahl-e-jauhar ko miTā sakte haiñ kab be-jauhar

mushk kī bū ko miTā detī hai kab sair kī bū

dam hameñ dene ko aayā hai are jā vaa.iz

muñh se aatī hai chalī tere abhī shiir kī bū

is zamāne ke amīroñ se na rakh chashm-e-husūl

kis ne sūñghī hai jahāñ meñ gul-e-tasvīr kī bū

aah kī siiḳh palaT ātish-e-ġham par jaldī

chalī aatī hai kabāb-e-dil-e-dil-gīr kī bū

pahuñchī yāqūb ko haañ pairahan-e-yūsuf kī

misr se dam meñ jo allāh ne taqdīr kī bū

dam meñ Dālegā mirā nāla-e-shab-gīr nikāl

naak kī raah dimāġh-e-falak-e-pīr kī bū

sach to ye baat hai ai 'aish' ki paate haiñ yahāñ

tere ash.ār meñ tarz-e-suḳhan-e-'mīr' kī bū

jo dil-awez hai us zulf-e-girah-gir ki bu

aisi aalam mein kisi ki nahin tasir ki bu

ahl-e-jauhar ko miTa sakte hain kab be-jauhar

mushk ki bu ko miTa deti hai kab sair ki bu

dam hamein dene ko aaya hai are ja waiz

munh se aati hai chali tere abhi shir ki bu

is zamane ke amiron se na rakh chashm-e-husul

kis ne sunghi hai jahan mein gul-e-taswir ki bu

aah ki siKH palaT aatish-e-gham par jaldi

chali aati hai kabab-e-dil-e-dil-gir ki bu

pahunchi yaqub ko han pairahan-e-yusuf ki

misr se dam mein jo allah ne taqdir ki bu

dam mein Dalega mera nala-e-shab-gir nikal

nak ki rah dimagh-e-falak-e-pir ki bu

sach to ye baat hai ai 'aish' ki pate hain yahan

tere ashaar mein tarz-e-suKHan-e-'mir' ki bu