jo dil ki bargah mein tajalliyan dikha gaya

jo dil kī bārgāh meñ tajalliyāñ dikhā gayā

mire havās-o-hosh par surūr ban ke chhā gayā

tire baġhair zindagī guzārnā muhāl thā

magar ye qalb-e-nā-tavāñ ye bojh bhī uThā gayā

jo shaḳhs merī zaat meñ basā huā thā muddatoñ

na jaane mujh se ruuTh kar vo ab kahāñ chalā gayā

phir aaj ik havā-e-ġham udaas dil ko kar ga.ī

ḳhayāl terī yaad kā nazar ko phir bujhā gayā

kabhī qadam jo thak ga.e ġhamoñ kī rahguzār meñ

tirī nazar kā nuur thā jo hausle baḌhā gayā

jo dil ki bargah mein tajalliyan dikha gaya

mere hawas-o-hosh par surur ban ke chha gaya

tere baghair zindagi guzarna muhaal tha

magar ye qalb-e-na-tawan ye bojh bhi uTha gaya

jo shaKHs meri zat mein basa hua tha muddaton

na jaane mujh se ruTh kar wo ab kahan chala gaya

phir aaj ek hawa-e-gham udas dil ko kar gai

KHayal teri yaad ka nazar ko phir bujha gaya

kabhi qadam jo thak gae ghamon ki rahguzar mein

teri nazar ka nur tha jo hausle baDha gaya