jo dil qabu mein ho to koi ruswa-e-jahan kyun ho

jo dil qaabū meñ ho to koī rusvā-e-jahāñ kyuuñ ho

ḳhalish kyuuñ ho tapish kyuuñ ho qalaq kyuuñ ho fuġhāñ kyuuñ ho

mazā aatā nahīñ tham tham ke ham ko ranj-o-rāhat kā

ḳhushī ho ġham ho jo kuchh ho ilāhī nā-gahāñ kyuuñ ho

ye misra' likh diyā zālim ne merī lauh-e-turbat par

jo ho furqat kī betābī to yuuñ ḳhvāb-e-girāñ kyuuñ ho

hamesha aadmī kā aadmī ġham-ḳhvār hotā hai

yahī be-e'tibārī ho to koī rāzdāñ kyuuñ ho

bahut nikleñge roz-e-hashr tere jaur ke ḳhvāhāñ

sitam kā hausla duniyā meñ sarf-e-imtihāñ kyuuñ ho

ġhazab aayā sitam TuuTā qayāmat ho ga.ī barpā

ye pūchhā thā ki tum āzurda mujh se merī jaañ kyuuñ ho

unhīñ ko ranjish-e-bejā hai lekin hai to ham se hai

mohabbat gar na ho bāham shikāyat darmiyāñ kyuuñ ho

ga.e Thukrā ke mujh ko aur phir kahte ga.e ye bhī

nasīb-e-dushmanāñ to pā.emāl-e-āsmāñ kyuuñ ho

na.ī tākīd hai zabt-e-mohabbat kī vo kahte haiñ

jigar ho to fuġhāñ kyuuñ ho dahan ho to zabāñ kyuuñ ho

sharīk-e-daur-e-mai bazm-e-adū meñ ḳhaak hote ham

kisī ne rāt-bhar itnā na pūchhā tum yahāñ kyuuñ ho

tahammul kar sake kyā husn-e-nāzuk un nigāhoñ kā

use maiñ ne chhupāyā hai vagarna vo nihāñ kyuuñ ho

ḳhudā shāhid ḳhudā shāhid hai kyuuñ kahte ho vā'doñ par

ḳhudā ko kyā ġharaz mere tumhāre darmiyāñ kyuuñ ho

jigar se kam nahīñ ai chāragar dāġh-e-jigar mujh ko

jo paidā kī ho mar mar ke vo daulat rā.egāñ kyuuñ ho

naved-e-jāñ-fizā hai kyā ḳhabar qātil ke aane kī

batāo to sahī tum 'dāġh' aise shādmāñ kyuuñ ho

jo dil qabu mein ho to koi ruswa-e-jahan kyun ho

KHalish kyun ho tapish kyun ho qalaq kyun ho fughan kyun ho

maza aata nahin tham tham ke hum ko ranj-o-rahat ka

KHushi ho gham ho jo kuchh ho ilahi na-gahan kyun ho

ye misra' likh diya zalim ne meri lauh-e-turbat par

jo ho furqat ki betabi to yun KHwab-e-giran kyun ho

hamesha aadmi ka aadmi gham-KHwar hota hai

yahi be-e'tibari ho to koi raazdan kyun ho

bahut niklenge roz-e-hashr tere jaur ke KHwahan

sitam ka hausla duniya mein sarf-e-imtihan kyun ho

ghazab aaya sitam TuTa qayamat ho gai barpa

ye puchha tha ki tum aazurda mujh se meri jaan kyun ho

unhin ko ranjish-e-beja hai lekin hai to hum se hai

mohabbat gar na ho baham shikayat darmiyan kyun ho

gae Thukra ke mujh ko aur phir kahte gae ye bhi

nasib-e-dushmanan to paemal-e-asman kyun ho

nai takid hai zabt-e-mohabbat ki wo kahte hain

jigar ho to fughan kyun ho dahan ho to zaban kyun ho

sharik-e-daur-e-mai bazm-e-adu mein KHak hote hum

kisi ne raat-bhar itna na puchha tum yahan kyun ho

tahammul kar sake kya husn-e-nazuk un nigahon ka

use main ne chhupaya hai wagarna wo nihan kyun ho

KHuda shahid KHuda shahid hai kyun kahte ho wa'don par

KHuda ko kya gharaz mere tumhaare darmiyan kyun ho

jigar se kam nahin ai chaaragar dagh-e-jigar mujh ko

jo paida ki ho mar mar ke wo daulat raegan kyun ho

nawed-e-jaan-fiza hai kya KHabar qatil ke aane ki

batao to sahi tum 'dagh' aise shadman kyun ho