jo dil se nikle usi baat ko baja samjho

jo dil se nikle usī baat ko bajā samjho

zabān-e-ḳhalq ko naqqāra-e-ḳhudā samjho

jo sirf baat kare aur 'amal meñ korā ho

tum aise shaḳhs ke kirdār ko riyā samjho

fareb aise na do silsile baḌhā ke mujhe

mire ḳhulūs mire pyaar ko zarā samjho

jahān-e-fānī meñ har chiiz hai zavāl-pazīr

fanā baqā ko yahāñ marzi-e-ḳhudā samjho

tum us ko laakh mohabbat se bhī ho samjhāte

jo apnā ḳhair na chāhe use burā samjho

tumheñ najāt jo miltī rahī har aafat se

tumhāre saath hai māñ-bāp kī du'ā samjho

tumhāre fan ko jo 'azmat milī hai ai 'dā.em'

hai rab kī ḳhaas 'ināyat ise 'atā samjho

jo dil se nikle usi baat ko baja samjho

zaban-e-KHalq ko naqqara-e-KHuda samjho

jo sirf baat kare aur 'amal mein kora ho

tum aise shaKHs ke kirdar ko riya samjho

fareb aise na do silsile baDha ke mujhe

mere KHulus mere pyar ko zara samjho

jahan-e-fani mein har chiz hai zawal-pazir

fana baqa ko yahan marzi-e-KHuda samjho

tum us ko lakh mohabbat se bhi ho samjhate

jo apna KHair na chahe use bura samjho

tumhein najat jo milti rahi har aafat se

tumhaare sath hai man-bap ki du'a samjho

tumhaare fan ko jo 'azmat mili hai ai 'daem'

hai rab ki KHas 'inayat ise 'ata samjho