jo diya tu ne hamein wo surat-e-zar rakh liya

jo diyā tū ne hameñ vo sūrat-e-zar rakh liyā

tū ne patthar de diyā to ham ne patthar rakh liyā

siskiyoñ ne chaar sau dekhā koī Dhāras na thī

ek tanhā.ī thī us kī god meñ sar rakh liyā

ghuT gayā tahzīb ke gumbad meñ har ḳhvāhish kā dam

jañgaloñ kā mor ham ne ghar ke andar rakh liyā

mere bāloñ pe sajā dī garm sahrāoñ kī dhuul

apnī āñkhoñ ke liye us ne samundar rakh liyā

darz tak se ab na phūTegī tamannā kī phuvār

chashma-e-ḳhvāhish pe ham ne dil kā patthar rakh liyā

vo jo uḌ kar jā chukā hai duur mere haath se

us kī ik bichhḌī nishānī taaq meñ par rakh liyā

diid kī jholī kahīñ ḳhālī na rah jaa.e 'adīm'

ham ne āñkhoñ meñ tire jaane kā manzar rakh liyā

pheñk deñ galiyāñ birūn-e-sahn sab is ne 'adīm'

ghar ki jo māñgā thā maiñ ne vo pas-e-dar rakh liyā

jo diya tu ne hamein wo surat-e-zar rakh liya

tu ne patthar de diya to hum ne patthar rakh liya

siskiyon ne chaar sau dekha koi Dhaaras na thi

ek tanhai thi us ki god mein sar rakh liya

ghuT gaya tahzib ke gumbad mein har KHwahish ka dam

jangalon ka mor hum ne ghar ke andar rakh liya

mere baalon pe saja di garm sahraon ki dhul

apni aankhon ke liye us ne samundar rakh liya

darz tak se ab na phuTegi tamanna ki phuwar

chashma-e-KHwahish pe hum ne dil ka patthar rakh liya

wo jo uD kar ja chuka hai dur mere hath se

us ki ek bichhDi nishani taq mein par rakh liya

did ki jholi kahin KHali na rah jae 'adim'

hum ne aankhon mein tere jaane ka manzar rakh liya

phenk den galiyan birun-e-sahn sab is ne 'adim'

ghar ki jo manga tha main ne wo pas-e-dar rakh liya