jo ek umr hansa tha mujhe satate hue

jo ek umr hañsā thā mujhe satāte hue

vo ro paḌā hai mirī dāstāñ sunāte hue

kisī ke pyaar kī ye āḳhirī nishānī hai

havā ne ye bhī na sochā diyā bujhāte hue

tumheñ bhī vaqt kī gardish nigal na jaa.e kahīñ

zarā ḳhayāl ho merī hañsī uḌāte hue

vo shaḳhs jis kā ta.alluq na thā koī mujh se

ye kyā ki rone lagā mujh se duur jaate hue

nigāh-e-nāz kī farmā-ravā.iyāñ tauba

vo muskurā bhī rahī thiiñ sazā sunāte hue

ilaaj apne añdheroñ kā aap ḳhud kiije

kumhār thak se ga.e haiñ diyā banāte hue

ghulā hai dard fazāoñ meñ is tarah 'sādiq'

ki jaan jaatī hai ik baar muskurāte hue

jo ek umr hansa tha mujhe satate hue

wo ro paDa hai meri dastan sunate hue

kisi ke pyar ki ye aaKHiri nishani hai

hawa ne ye bhi na socha diya bujhate hue

tumhein bhi waqt ki gardish nigal na jae kahin

zara KHayal ho meri hansi uDate hue

wo shaKHs jis ka talluq na tha koi mujh se

ye kya ki rone laga mujh se dur jate hue

nigah-e-naz ki farma-rawaiyan tauba

wo muskura bhi rahi thin saza sunate hue

ilaj apne andheron ka aap KHud kije

kumhaar thak se gae hain diya banate hue

ghula hai dard fazaon mein is tarah 'sadiq'

ki jaan jati hai ek bar muskuraate hue