jo fasla hai main usko miTa ke dekhunga

jo fāsla hai maiñ us ko miTā ke dekhūñgā

maiñ us ke chehre se parda haTā ke dekhūñgā

vo apne husn mirī aarzū ke zo.am meñ hai

maiñ us ke but ko kisī din girā ke dekhūñgā

vo taḳht chhoḌ ke apnā zarūr aa.egā

maiñ āsmān ko sar pe uThā ke dekhūñgā

mire firāq meñ us kā bhī haal mujh sā hai

maiñ aap jā ke yā us ko bulā ke dekhūñgā

zamāna dekhegā ik hashr aaj botal meñ

maiñ ab sharāb meñ aañsū milā ke dekhūñgā

misāl-e-mūsā mirī aañkh meñ hai ḳhū-e-jamāl

meñ jā ke tuur pe ḳhud ko jalā ke dekhūñgā

rukegā kaun ġharībī meñ mere saath 'razā'

charāġh-e-ḳhema-e-dil ko bujhā ke dekhūñgā

jo fasla hai main us ko miTa ke dekhunga

main us ke chehre se parda haTa ke dekhunga

wo apne husn meri aarzu ke zoam mein hai

main us ke but ko kisi din gira ke dekhunga

wo taKHt chhoD ke apna zarur aaega

main aasman ko sar pe uTha ke dekhunga

mere firaq mein us ka bhi haal mujh sa hai

main aap ja ke ya us ko bula ke dekhunga

zamana dekhega ek hashr aaj botal mein

main ab sharab mein aansu mila ke dekhunga

misal-e-musa meri aankh mein hai KHu-e-jamal

mein ja ke tur pe KHud ko jala ke dekhunga

rukega kaun gharibi mein mere sath 'raza'

charagh-e-KHema-e-dil ko bujha ke dekhunga