jo hath apne sabze ka ghoDa laga

jo haath apne sabze kā ghoḌā lagā

to sulfe kā aur us ko koḌā lagā

mire hī jo baazū meñ ik niil sā

so tere hai paañv kā toḌā lagā

ajī chashm-e-bad-dūr nām-e-ḳhudā

tumheñ kyā bhalā surḳh joḌā lagā

bhalā aap sharmā.e kis vāste

kabūtar kā bāham jo joḌā lagā

ye dukhtī nigāhoñ se ghūrā mujhe

ki dukhne mire dil kā phoḌā lagā

lagī kahne 'inshā' ko shab vo parī

mujhe bhuut ho ye nigoḌā lagā

jo hath apne sabze ka ghoDa laga

to sulfe ka aur us ko koDa laga

mere hi jo bazu mein ek nil sa

so tere hai panw ka toDa laga

aji chashm-e-bad-dur nam-e-KHuda

tumhein kya bhala surKH joDa laga

bhala aap sharmae kis waste

kabutar ka baham jo joDa laga

ye dukhti nigahon se ghura mujhe

ki dukhne mere dil ka phoDa laga

lagi kahne 'insha' ko shab wo pari

mujhe bhut ho ye nigoDa laga