jo hain rind-e-azal gulshan ko mai-KHana samajhte hain

jo haiñ rind-e-azal gulshan ko mai-ḳhāna samajhte haiñ

kalī ko shīsha-e-mai gul ko paimāna samajhte haiñ

haqīqat-āshnā-e-gulsitāñ fasl-e-bahārāñ meñ

hujūm-e-rang-o-bū ko barq-e-kāshāna samajhte haiñ

kisī din jis ke sho.ale ḳhirman-e-hastī ko phūñkeñge

usī bijlī ko ham sham.a-e-tarab-ḳhāna samajhte haiñ

nigāheñ Dālte haiñ markaz-e-vahdat se kasrat par

haram meñ rah ke ham rāz-e-sanam-ḳhāna samajhte haiñ

chhupā lete haiñ har zaḳhm-e-jigar ko fasl-e-gul meñ bhī

chaman meñ phuul manshā-e-ġham-e-pinhāñ samajhte haiñ

‘Alam’ rabt-e-dil-o-paikāñ ab is aalam ko pahuñchā hai

ki ham paikāñ ko dil dil ko kabhī paikāñ samajhte haiñ

jo hain rind-e-azal gulshan ko mai-KHana samajhte hain

kali ko shisha-e-mai gul ko paimana samajhte hain

haqiqat-ashna-e-gulsitan fasl-e-bahaaran mein

hujum-e-rang-o-bu ko barq-e-kashana samajhte hain

kisi din jis ke shoale KHirman-e-hasti ko phunkenge

usi bijli ko hum shama-e-tarab-KHana samajhte hain

nigahen Dalte hain markaz-e-wahdat se kasrat par

haram mein rah ke hum raaz-e-sanam-KHana samajhte hain

chhupa lete hain har zaKHm-e-jigar ko fasl-e-gul mein bhi

chaman mein phul mansha-e-gham-e-pinhan samajhte hain

‘Alam’ rabt-e-dil-o-paikan ab is aalam ko pahuncha hai

ki hum paikan ko dil dil ko kabhi paikan samajhte hain