jo hum kahen wahi tarz-e-bayan rakhta hai

jo ham kaheñ vahī tarz-e-bayān rakhtā hai

vo apne muñh meñ hamārī zabān rakhtā hai

rasā.ī tā-ba-sar-e-lā-makān rakhtā hai

parind-e-fikr ġhazab kī uḌaan rakhtā hai

sunā hai paañv tale āsmān rakhtā hai

faqīr-e-shahr baḌī ān-bān rakhtā hai

vo jis ko sāya-e-dīvār tak nasīb nahīñ

na jaane zehn meñ kitne makān rakhtā hai

bahut balīġh hai andāz-e-guftugū us kā

har ek lafz meñ ik dāstān rakhtā hai

koī na dekh sake us ke ghar kī hālat-e-zār

vo shāyad is liye ūñchā makān rakhtā hai

vo sab se miltā hai hañs kar baḌe ḳhulūs ke saath

anā kī teġh magar darmiyān rakhtā hai

hamāre shahr kī āġhosh vā hai sab ke liye

baḌī kushāda-dilī mezbān rakhtā hai

hameñ to gaañv kī āsūdgī ne luuT liyā

jahāñ faqīr bhī apnā makān rakhtā hai

usī ke sar pe koī sā.ebāñ nahīñ 'tāhir'

jo ḳhud ko sab ke liye sā.ebān rakhtā hai

jo hum kahen wahi tarz-e-bayan rakhta hai

wo apne munh mein hamari zaban rakhta hai

rasai ta-ba-sar-e-la-makan rakhta hai

parind-e-fikr ghazab ki uDan rakhta hai

suna hai panw tale aasman rakhta hai

faqir-e-shahr baDi aan-ban rakhta hai

wo jis ko saya-e-diwar tak nasib nahin

na jaane zehn mein kitne makan rakhta hai

bahut baligh hai andaz-e-guftugu us ka

har ek lafz mein ek dastan rakhta hai

koi na dekh sake us ke ghar ki haalat-e-zar

wo shayad is liye uncha makan rakhta hai

wo sab se milta hai hans kar baDe KHulus ke sath

ana ki tegh magar darmiyan rakhta hai

hamare shahr ki aaghosh wa hai sab ke liye

baDi kushada-dili mezban rakhta hai

hamein to ganw ki aasudgi ne luT liya

jahan faqir bhi apna makan rakhta hai

usi ke sar pe koi saeban nahin 'tahir'

jo KHud ko sab ke liye saeban rakhta hai