jo hanste bolte to sharh-e-arzu karte

jo hañste bolte to sharh-e-ārzū karte

butoñ se kis tarah allāh guftugū karte

halāk hasrat-e-marg-e-nau ai ajal hote

jo aur jiite to marne kī aarzū karte

namāz paḌhnī thī mehrāb-e-teġh-e-qātil meñ

na apne ḳhuun se kis tarah ham vuzū karte

jo dekh lete dil-e-bā-vafā ke dāġhoñ ko

to gul chaman meñ na da.avā-e-rang-o-bū karte

muḳhālifat meñ bhī gardūñ kī kaam ban jaatā

ki ham ḳhilāf tamannā ke aarzū karte

na sunte ek bhī ye dostī kī ḳhūbī thī

hazār tum se burā.ī mirī adū karte

huzūr jhuuT kī tāvīl tā-kujā āḳhir

kahāñ tak aap kī bātoñ meñ ham rafū karte

na poñchhte kabhī āñchal se ġhair ke aañsū

'shahīr' vo jo mirā pās-e-ābrū karte

jo hanste bolte to sharh-e-arzu karte

buton se kis tarah allah guftugu karte

halak hasrat-e-marg-e-nau ai ajal hote

jo aur jite to marne ki aarzu karte

namaz paDhni thi mehrab-e-tegh-e-qatil mein

na apne KHun se kis tarah hum wuzu karte

jo dekh lete dil-e-ba-wafa ke daghon ko

to gul chaman mein na dawa-e-rang-o-bu karte

muKHalifat mein bhi gardun ki kaam ban jata

ki hum KHilaf tamanna ke aarzu karte

na sunte ek bhi ye dosti ki KHubi thi

hazar tum se burai meri adu karte

huzur jhuT ki tawil ta-kuja aaKHir

kahan tak aap ki baaton mein hum rafu karte

na ponchhte kabhi aanchal se ghair ke aansu

'shahir' wo jo mera pas-e-abru karte