jo ho sake to kabhi qaid-e-jism-o-jaan se nikal

jo ho sake to kabhī qaid-e-jism-o-jāñ se nikal

yahāñ se maiñ bhī nikaltā huuñ tū vahāñ se nikal

idhar udhar se nikalnā bahut hī mushkil hai

baḌhegī bhiiḌ abhī aur darmiyāñ se nikal

zamīñ bhī terī hai mālik ġhulām bhī tere

kabhī to mere ḳhudā apne āsmāñ se nikal

azal se dasht-e-junūñ tere intizār meñ hai

qabā-e-āgahī ab pheñk de makāñ se nikal

tujhe to manzil-e-mauhūm tak pahuñchnā hai

kaḌī hai dhuup magar phir bhī sā.ebāñ se nikal

sunegā koī na samjhegā terī baat 'shamīm'

hazār baar kahā harf-e-rā.egāñ se nikal

jo ho sake to kabhi qaid-e-jism-o-jaan se nikal

yahan se main bhi nikalta hun tu wahan se nikal

idhar udhar se nikalna bahut hi mushkil hai

baDhegi bhiD abhi aur darmiyan se nikal

zamin bhi teri hai malik ghulam bhi tere

kabhi to mere KHuda apne aasman se nikal

azal se dasht-e-junun tere intizar mein hai

qaba-e-agahi ab phenk de makan se nikal

tujhe to manzil-e-mauhum tak pahunchna hai

kaDi hai dhup magar phir bhi saeban se nikal

sunega koi na samjhega teri baat 'shamim'

hazar bar kaha harf-e-raegan se nikal