jo huā qadd-e-kashīda kā marīz
vo huā sū-e-lahad lambā marīz
baal se bārīk jism-e-zār hai
luT gayā hai zulf kā aisā marīz
vo hai bīmarī-e-ulfat lā-'ilāj
jis kā 'iisā se na ho achchhā marīz
sharbat-e-unnāb-e-lab mumkin nahīñ
be-davā-dārū huuñ maiñ martā marīz
vo lagā ik pal meñ āñkheñ māñgne
jis ko us kī chashm kā dekhā marīz
gaah kholīñ gaah āñkheñ band kiiñ
ġhash huā gah hosh meñ aayā marīz
ho jo mumkin bosa-e-seb-e-zaqan
bahr-e-tāqat aur khaa.e kyā marīz
kohkan kā naam le kar vo piye
āb-e-shīrīñ kā ho jo pyāsā marīz
surḳh Dorā us kī āñkhoñ meñ nahīñ
pahne haiñ naaḌe kā ye ganDā marīz
is chaman kī ye havā nā-sāz hai
nargis-e-shahlā ko bhī paayā marīz
vo masīhā baam par hai jalva-gar
aur uupar kā hai dam bhartā marīz
'shād' ro ġhurbat pe us bīmār kī
karbalā se shaam jo pahuñchā marīz
jo hua qadd-e-kashida ka mariz
wo hua su-e-lahad lamba mariz
baal se barik jism-e-zar hai
luT gaya hai zulf ka aisa mariz
wo hai bimari-e-ulfat la-'ilaj
jis ka 'isa se na ho achchha mariz
sharbat-e-unnab-e-lab mumkin nahin
be-dawa-daru hun main marta mariz
wo laga ek pal mein aankhen mangne
jis ko us ki chashm ka dekha mariz
gah kholin gah aankhen band kin
ghash hua gah hosh mein aaya mariz
ho jo mumkin bosa-e-seb-e-zaqan
bahr-e-taqat aur khae kya mariz
kohkan ka nam le kar wo piye
aab-e-shirin ka ho jo pyasa mariz
surKH Dora us ki aankhon mein nahin
pahne hain naDe ka ye ganDa mariz
is chaman ki ye hawa na-saz hai
nargis-e-shahla ko bhi paya mariz
wo masiha baam par hai jalwa-gar
aur upar ka hai dam bharta mariz
'shad' ro ghurbat pe us bimar ki
karbala se sham jo pahuncha mariz
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.