jo huruf likh gaya tha meri aarzu ka bachpan

jo hurūf likh gayā thā mirī aarzū kā bachpan

unheñ dho sake na dil se mirī zindagī ke sāvan

vo jo din bikhar chuke haiñ vo jo ḳhvāb mar chuke haiñ

maiñ unhī kā huuñ mujāvir mirā dil unhī kā madfan

yahī ek aarzū thī ki mujhe koī pukāre

so pukārtī hai ab tak mujhe apne dil kī dhaḌkan

koī TūTtā sitāra mujhe kaash phir sadā de

ki ye koh-o-dasht-o-sahrā haiñ sukūt-e-shab se raushan

tirī manzil-e-vafā meñ huā ḳhud se āshnā maiñ

tirī yaad kā karam hai ki yahī hai dost dushman

tire rū-ba-rū huuñ lekin nahīñ rū-shanās tujh se

tujhe dekhne na degī tire dekhne kī uljhan

'zafar' aaj dil kā aalam hai ajab maiñ kis se pūchhūñ

vo sabā kidhar se aa.ī jo khilā ga.ī ye gulshan

jo huruf likh gaya tha meri aarzu ka bachpan

unhen dho sake na dil se meri zindagi ke sawan

wo jo din bikhar chuke hain wo jo KHwab mar chuke hain

main unhi ka hun mujawir mera dil unhi ka madfan

yahi ek aarzu thi ki mujhe koi pukare

so pukarti hai ab tak mujhe apne dil ki dhaDkan

koi TuTta sitara mujhe kash phir sada de

ki ye koh-o-dasht-o-sahra hain sukut-e-shab se raushan

teri manzil-e-wafa mein hua KHud se aashna main

teri yaad ka karam hai ki yahi hai dost dushman

tere ru-ba-ru hun lekin nahin ru-shanas tujh se

tujhe dekhne na degi tere dekhne ki uljhan

'zafar' aaj dil ka aalam hai ajab main kis se puchhun

wo saba kidhar se aai jo khila gai ye gulshan