jo ittifaq se hum sahab-e-farash hue

jo ittifāq se ham sāhab-e-farāsh hue

to ham pe rāz-e-azīzāñ bhī ḳhuub faash hue

ham aa.ina to nahīñ phir bhī raat bistar par

gire jo aa ke to girte hī pāsh-pāsh hue

kise sunā.iye āzādgān-e-shahr kā haal

ki rafta-rafta sabhī kushta-e-ma.āsh hue

na pūchh ashk-e-riyā-kār kā ma.aal ai dost

vo ashk to ruḳh-e-ehsās kī ḳharāsh hue

tamām umr talāsh-e-sukūñ rahī ham ko

tamām umr na āsūda-e-talāsh hue

kahāñ kī naġhma-sarā.ī ki sāz-e-hastī ke

tamām taar hī mahrūm-e-irti.āsh hue

janāb-e-'lais' jo ahbāb se gurezāñ the

ye inqalāb to dekho ki yār-bāsh hue

jo ittifaq se hum sahab-e-farash hue

to hum pe raaz-e-azizan bhi KHub fash hue

hum aaina to nahin phir bhi raat bistar par

gire jo aa ke to girte hi pash-pash hue

kise sunaiye aazadgan-e-shahr ka haal

ki rafta-rafta sabhi kushta-e-maash hue

na puchh ashk-e-riya-kar ka maal ai dost

wo ashk to ruKH-e-ehsas ki KHarash hue

tamam umr talash-e-sukun rahi hum ko

tamam umr na aasuda-e-talash hue

kahan ki naghma-sarai ki saz-e-hasti ke

tamam tar hi mahrum-e-irtiash hue

janab-e-'lais' jo ahbab se gurezan the

ye inqalab to dekho ki yar-bash hue