jo kah rahe hain ye andaz mujrimana hai

jo kah rahe haiñ ye andāz mujrimāna hai

lahū meñ un ke talātum nayā uThānā hai

nahīñ hai shikva raqīboñ se is tabāhī kā

ye apne haath se karnī kā shāḳhsāna hai

maiñ us ke aage bhalā kaise jiit saktā huuñ

vo jis kā shauq hai yaaro mujhe harānā hai

dayār-e-ġhair ke anjān dasht ke raahī

kise ḳhabar hai kahāñ kis kā āb-o-dāna hai

sadā faqīr kī elaan kartī hai goyā

mujhe talāsh-e-ruḳh-o-qalb-e-ājizāna hai

rumūz-e-fahm-o-farāsat haiñ har jagah pinhāñ

janāb-e-mīr kā har sher āqilāna hai

hai ye bhī bā.is-e.azāz ai mire munsif

hamāre shāna-ba-shāna tumhārā shāna hai

ḳhudā kare ki mirī qaum ko uruuj mile

amīr-e-shahr kā andāz fātehāna hai

ajab tamāsha hai hairān ho rahā huuñ maiñ

ki jāhiloñ kā bhī andāz ālimāna hai

ajiib tarz-e-hukūmat hai hukmarānoñ kā

jidhar bhī dekhiye 'anjum' ġharīb-ḳhāna hai

jo kah rahe hain ye andaz mujrimana hai

lahu mein un ke talatum naya uThana hai

nahin hai shikwa raqibon se is tabahi ka

ye apne hath se karni ka shaKHsana hai

main us ke aage bhala kaise jit sakta hun

wo jis ka shauq hai yaro mujhe harana hai

dayar-e-ghair ke anjaan dasht ke rahi

kise KHabar hai kahan kis ka aab-o-dana hai

sada faqir ki elan karti hai goya

mujhe talash-e-ruKH-o-qalb-e-ajizana hai

rumuz-e-fahm-o-farasat hain har jagah pinhan

janab-e-mir ka har sher aaqilana hai

hai ye bhi bais-eazaz ai mere munsif

hamare shana-ba-shana tumhaara shana hai

KHuda kare ki meri qaum ko uruj mile

amir-e-shahr ka andaz fatehana hai

ajab tamasha hai hairan ho raha hun main

ki jahilon ka bhi andaz aalimana hai

ajib tarz-e-hukumat hai hukmaranon ka

jidhar bhi dekhiye 'anjum' gharib-KHana hai