jo kaho tum so hai baja sahab

jo kaho tum so hai bajā sāhab

ham bure hī sahī bhalā sāhab

sāda-zehnī meñ nukta-chīñ the tum

ab to haiñ harf-āshnā sāhab

na diyā rahm Tuk butoñ ke ta.iiñ

kyā kiyā haa.e ye ḳhudā sāhab

bandagī ek apnī kyā kam hai

aur kuchh tum se kahiye kyā sāhab

mehr-afzā hai muñh tumhārā hī

kuchh ġhazab to nahīñ huā sāhab

ḳhat ke phaTne kā tum se kyā shikva

apne tāle.a kā ye likhā sāhab

phir ga.iiñ āñkheñ tum na aan phire

dekhā tum ko bhī vāh-vā sāhab

shauq-e-ruḳh yād-e-lab ġham-e-dīdār

jī meñ kyā kyā mire rahā sāhab

bhuul jaanā nahīñ ġhulām kā ḳhuub

yaad ḳhātir rahe mirā sāhab

kin ne sun sher-e-'mīr' ye na kahā

kahiyo phir haa.e kyā kahā sāhab

jo kaho tum so hai baja sahab

hum bure hi sahi bhala sahab

sada-zehni mein nukta-chin the tum

ab to hain harf-ashna sahab

na diya rahm Tuk buton ke tain

kya kiya hae ye KHuda sahab

bandagi ek apni kya kam hai

aur kuchh tum se kahiye kya sahab

mehr-afza hai munh tumhaara hi

kuchh ghazab to nahin hua sahab

KHat ke phaTne ka tum se kya shikwa

apne talea ka ye likha sahab

phir gain aankhen tum na aan phire

dekha tum ko bhi wah-wa sahab

shauq-e-ruKH yaad-e-lab gham-e-didar

ji mein kya kya mere raha sahab

bhul jaana nahin ghulam ka KHub

yaad KHatir rahe mera sahab

kin ne sun sher-e-'mir' ye na kaha

kahiyo phir hae kya kaha sahab