jo KHushk jhil ki miTTi se aab mangte hain

jo ḳhushk jhiil kī miTTī se aab māñgte haiñ

vo añdhkār se rañgoñ ke ḳhvāb māñgte haiñ

lahū pilāte haiñ jo log ham ko jīvan-bhar

vo shaam hote hī kyuuñ kar sharāb māñgte haiñ

unheñ ḳhabar hī nahīñ hai ḳhud apne hone kī

jo har savāl se pahle javāb māñgte haiñ

vo qatl karne kī aate haiñ ḳhvāhisheñ le kar

jo māñgte haiñ to taaza gulāb māñgte haiñ

bhulā ke rakhte haiñ jo log sach kī kaḌvāhaT

jo mīThe lafzoñ kī har-dam naqāb māñgte haiñ

hamārī umr bhī lag jaa.e un ko ai maulā

jo dā.eroñ se nikal kar nisāb māñgte haiñ

amal kī raah se ġhāfil haiñ jo vahī 'rāhī'

ḳhudā se apne dukhoñ kā hisāb māñgte haiñ

jo KHushk jhil ki miTTi se aab mangte hain

wo andhkar se rangon ke KHwab mangte hain

lahu pilate hain jo log hum ko jiwan-bhar

wo sham hote hi kyun kar sharab mangte hain

unhen KHabar hi nahin hai KHud apne hone ki

jo har sawal se pahle jawab mangte hain

wo qatl karne ki aate hain KHwahishen le kar

jo mangte hain to taza gulab mangte hain

bhula ke rakhte hain jo log sach ki kaDwahaT

jo miThe lafzon ki har-dam naqab mangte hain

hamari umr bhi lag jae un ko ai maula

jo daeron se nikal kar nisab mangte hain

amal ki rah se ghafil hain jo wahi 'rahi'

KHuda se apne dukhon ka hisab mangte hain