jo kuchh ki hai duniya mein wo insan ke liye hai

jo kuchh ki hai duniyā meñ vo insāñ ke liye hai

ārāsta ye ghar isī mehmāñ ke liye hai

zulfeñ tirī kāfir unheñ dil se mire kyā kaam

dil kaaba hai aur kaaba musalmāñ ke liye hai

ho qaid-e-tafakkur se kab āzād suḳhan-var

manzūr qafas murġh-e-ḳhush-alhāñ ke liye hai

apnoñ se na mil apne haiñ sab apnoñ ke dushman

har nai meñ bharī aag nīstāñ ke liye hai

kuchh baḳht se mere jo sivā hai vo siyāhī

baaqī hai to merī shab-e-hijrāñ ke liye hai

dīvāna huuñ maiñ bhī vo tamāshā ki mirā zikr

goyā sabaq atfāl-e-dabistāñ ke liye hai

hai bāda-kashoñ ke liye ik ġhaib se tā.īd

zāhid jo duā māñgtā bārāñ ke liye hai

changul meñ hai muuzī ke dil us chashm ke hāthoñ

gherā ye ġhazab panja-e-mizhgāñ ke liye hai

maiñ kis kī nigāhoñ kā huuñ vahshī ki mirī ḳhaak

ik kohl-e-basar chashm-e-ġhazālāñ ke liye hai

dil bhī hai balā qābil-e-mashq-e-sitam-o-nāz

jo tiir hai us tūda-e-tūfāñ ke liye hai

nikle koī kyā qaid-e-alā.iq se ki ai 'zauq'

dar hī nahīñ is ḳhāna-e-zindāñ ke liye hai

jo kuchh ki hai duniya mein wo insan ke liye hai

aarasta ye ghar isi mehman ke liye hai

zulfen teri kafir unhen dil se mere kya kaam

dil kaba hai aur kaba musalman ke liye hai

ho qaid-e-tafakkur se kab aazad suKHan-war

manzur qafas murgh-e-KHush-alhan ke liye hai

apnon se na mil apne hain sab apnon ke dushman

har nai mein bhari aag nistan ke liye hai

kuchh baKHt se mere jo siwa hai wo siyahi

baqi hai to meri shab-e-hijran ke liye hai

diwana hun main bhi wo tamasha ki mera zikr

goya sabaq atfal-e-dabistan ke liye hai

hai baada-kashon ke liye ek ghaib se taid

zahid jo dua mangta baran ke liye hai

changul mein hai muzi ke dil us chashm ke hathon

ghera ye ghazab panja-e-mizhgan ke liye hai

main kis ki nigahon ka hun wahshi ki meri KHak

ek kohl-e-basar chashm-e-ghazalan ke liye hai

dil bhi hai bala qabil-e-mashq-e-sitam-o-naz

jo tir hai us tuda-e-tufan ke liye hai

nikle koi kya qaid-e-alaiq se ki ai 'zauq'

dar hi nahin is KHana-e-zindan ke liye hai