jo kuchh ki tha wazaif-o-aurad rah gaya

jo kuchh ki thā vazā.if-o-aurād rah gayā

terā hī ek naam faqat yaad rah gayā

zālim tirī nigah ne kiye ghar ke ghar ḳharāb

hogā koī makāñ ki vo ābād rah gayā

jaate haiñ ham-safīr chaman ko par ek maiñ

yaañ kushta-e-taġhāful-e-sayyād rah gayā

juuñ hī do-chār aa ke huā vo nazar-fareb

le kar qalam ko haath meñ bahzād rah gayā

is sarv-e-gul-azār kī tarz-e-ḳhirām dekh

ḳhajlat se gaḌ zamīn meñ shamshād rah gayā

kis kis kā dil na shaad kiyā tū ne ai falak

ik maiñ hī ġham-zada huuñ ki nāshād rah gayā

'bedār' rāh-e-ishq kisī se na tai huī

sahrā meñ qais koh meñ farhād rah gayā

jo kuchh ki tha wazaif-o-aurad rah gaya

tera hi ek nam faqat yaad rah gaya

zalim teri nigah ne kiye ghar ke ghar KHarab

hoga koi makan ki wo aabaad rah gaya

jate hain ham-safir chaman ko par ek main

yan kushta-e-taghaful-e-sayyaad rah gaya

jun hi do-chaar aa ke hua wo nazar-fareb

le kar qalam ko hath mein bahzad rah gaya

is sarw-e-gul-azar ki tarz-e-KHiram dekh

KHajlat se gaD zamin mein shamshad rah gaya

kis kis ka dil na shad kiya tu ne ai falak

ek main hi gham-zada hun ki nashad rah gaya

'bedar' rah-e-ishq kisi se na tai hui

sahra mein qais koh mein farhad rah gaya