jo kuchh ki tu ne sar pe mere dilruba kiya

jo kuchh ki tū ne sar pe mire dilrubā kiyā

dil hī vo jāntā hai kahūñ kyā maiñ kyā kiyā

mat pūchh āh-e-ishq ke ḳhūbāñ ke kyā kiyā

rusvā kiyā ḳharāb kiyā mubtalā kiyā

yaaro kahe rakhe huuñ maiñ da.avā na kījiyo

qātil ko apne maiñ ne ba-hal ḳhūñ-bahā kiyā

mulzim kiyā hai aah kisī ne mujhe ba-aks

ā.īna-rū kā apne maiñ jis se gila kiyā

ban baiThtā hai muft mire jī kā mudda.ī

iz.hār us se dil kā maiñ jab mudda.ā kiyā

be-mehrī terī kyā kahūñ ai sañg-dil ki chuur

mujh dil kā shīsha tū ne ba-sañg-e-jafā kiyā

us bin na qibla samjhūñ na qibla-numā ko maiñ

qibla use dil apne ko qibla-numā kiyā

maltā hai ai nigār kaf-e-pā kuuñ apne aah

kyā tū ne mere ḳhuun ko rañg-e-hinā kiyā

ye chashm-dāsht tujh se 'jahāñdār' ko na thī

jo ġhair ke liye use tū ne jafā kiyā

jo kuchh ki tu ne sar pe mere dilruba kiya

dil hi wo jaanta hai kahun kya main kya kiya

mat puchh aah-e-ishq ke KHuban ke kya kiya

ruswa kiya KHarab kiya mubtala kiya

yaro kahe rakhe hun main dawa na kijiyo

qatil ko apne main ne ba-hal KHun-baha kiya

mulzim kiya hai aah kisi ne mujhe ba-aks

aaina-ru ka apne main jis se gila kiya

ban baiThta hai muft mere ji ka muddai

izhaar us se dil ka main jab muddaa kiya

be-mehri teri kya kahun ai sang-dil ki chur

mujh dil ka shisha tu ne ba-sang-e-jafa kiya

us bin na qibla samjhun na qibla-numa ko main

qibla use dil apne ko qibla-numa kiya

malta hai ai nigar kaf-e-pa kun apne aah

kya tu ne mere KHun ko rang-e-hina kiya

ye chashm-dasht tujh se 'jahandar' ko na thi

jo ghair ke liye use tu ne jafa kiya