jo kuchh numayan hua al-aman maaz-allah

jo kuchh numāyāñ huā al-amāñ ma.āz-allāh

talattuf-o-karam-e-dostāñ ma.āz-allāh

kahegī vo nigah-e-itimād-e-āgīñ kyā

khuleñgī jab mirī ayyāriyāñ ma.āz-allāh

vo rāh-e-ishq meñ dil kī ma.āl-andeshī

vo merī aql kī nādāniyāñ ma.āz-allāh

phir un ke lutf kā mausam palaT ke aa.egā

taḳhaiyyulāt kī gul-kāriyāñ ma.āz-allāh

ye mai-kada to nahīñ ye to sehan-e-masjid hai

ye aa gayā maiñ kahāñ se kahāñ ma.āz-allāh

kabhī thā dār-e-vafā kū-e-ishq aur ab hai

qimār-ḳhāna-e-sūd-o-ziyāñ ma.āz-allāh

'nazīr' qissa-e-zaḳhm-e-nihāñ kahūñ kis se

ye dāstāñ hai bahut ḳhūñ-chakāñ ma.āz-allāh

jo kuchh numayan hua al-aman maaz-allah

talattuf-o-karam-e-dostan maaz-allah

kahegi wo nigah-e-itimad-e-agin kya

khulengi jab meri ayyariyan maaz-allah

wo rah-e-ishq mein dil ki maal-andeshi

wo meri aql ki nadaniyan maaz-allah

phir un ke lutf ka mausam palaT ke aaega

taKHaiyyulat ki gul-kariyan maaz-allah

ye mai-kada to nahin ye to sehan-e-masjid hai

ye aa gaya main kahan se kahan maaz-allah

kabhi tha dar-e-wafa ku-e-ishq aur ab hai

qimar-KHana-e-sud-o-ziyan maaz-allah

'nazir' qissa-e-zaKHm-e-nihan kahun kis se

ye dastan hai bahut KHun-chakan maaz-allah