jo log aadhe-adhure udas rahte hain

jo log ādhe-adhūre udaas rahte haiñ

unheñ sikhā.ūñgā kaise udaas rahte haiñ

udaas tum ho vahāñ par udaas ham haiñ yahāñ

kabhī milo to ikaTThe udaas rahte haiñ

banā.e rakhte haiñ har haal meñ tavāzun ham

ki ḳhush bhī itne the jitne udaas rahte haiñ

udāsī tere mulāzim na.e haiñ ham lekin

purāne vāloñ se achchhe udaas rahte haiñ

sharīk hote haiñ kam mahfil-e-udāsī meñ

ziyāda-tar to akele udaas rahte haiñ

tumhāre sāmne jaltā nahīñ hai un kā charāġh

ki chāñd ho to sitāre udaas rahte haiñ

kise dikhāoge apnī udāsiyāñ 'sharjīl'

yahāñ to tum se bhī achchhe udaas rahte haiñ

jo log aadhe-adhure udas rahte hain

unhen sikhaunga kaise udas rahte hain

udas tum ho wahan par udas hum hain yahan

kabhi milo to ikaTThe udas rahte hain

banae rakhte hain har haal mein tawazun hum

ki KHush bhi itne the jitne udas rahte hain

udasi tere mulazim nae hain hum lekin

purane walon se achchhe udas rahte hain

sharik hote hain kam mahfil-e-udasi mein

ziyaada-tar to akele udas rahte hain

tumhaare samne jalta nahin hai un ka charagh

ki chand ho to sitare udas rahte hain

kise dikhaoge apni udasiyan 'sharjil'

yahan to tum se bhi achchhe udas rahte hain