jo log dida-o-dil ko tabah dekhte hain

jo log dīda-o-dil ko tabāh dekhte haiñ

makīn ḳhvāb ke aane kī raah dekhte haiñ

hameñ ab aañkh ke manzar kā e'tibār nahīñ

so ham ab aks nahīñ bas nigāh dekhte haiñ

ye kaisī aag lagātā hai āftāb ki ham

zamīn-o-arsh ko hote siyāh dekhte haiñ

tum apnī zaat se koī mutālba na karo

ham apne-āp se kar ke nibāh dekhte haiñ

havā ne shahr kā naqsha badal diyā shāyad

ġhubār-e-rāh meñ ham sair-gāh dekhte haiñ

barā.e-nām hai bas merā muhtamim honā

ki intizām to sab sarbarāh dekhte haiñ

maiñ sāf-go huuñ magar be-zabān lagtā huuñ

ye kis tarah se mujhe sab gavāh dekhte haiñ

kareñge ham bhī kabhī farq mīThe khāre meñ

abhī to aab kī ḳhvāhish meñ chaah dekhte haiñ

nikal ke narġha-e-qahar-o-azāb se 'rāhat'

sab apne vāste jā-e-panāh dekhte haiñ

jo log dida-o-dil ko tabah dekhte hain

makin KHwab ke aane ki rah dekhte hain

hamein ab aankh ke manzar ka e'tibar nahin

so hum ab aks nahin bas nigah dekhte hain

ye kaisi aag lagata hai aaftab ki hum

zamin-o-arsh ko hote siyah dekhte hain

tum apni zat se koi mutalba na karo

hum apne-ap se kar ke nibah dekhte hain

hawa ne shahr ka naqsha badal diya shayad

ghubar-e-rah mein hum sair-gah dekhte hain

barae-nam hai bas mera muhtamim hona

ki intizam to sab sarbarah dekhte hain

main saf-go hun magar be-zaban lagta hun

ye kis tarah se mujhe sab gawah dekhte hain

karenge hum bhi kabhi farq miThe khaare mein

abhi to aab ki KHwahish mein chah dekhte hain

nikal ke nargha-e-qahar-o-azab se 'rahat'

sab apne waste ja-e-panah dekhte hain