jo luT gaya to har ek saz dastiyab hua

jo luT gayā to har ik saaz dastiyāb huā

bhaTak ke raah talāshī to kāmyāb huā

mirī hī chashm se sairāb vo sarāb huā

maiñ ho gayā koī kāñTā to vo gulāb huā

savāl karte zamāne guzar ga.e mujh ko

sukūt kar liyā to phir vahī javāb huā

bhulā ke ḳhud ko har ik dil hai dekhne meñ lagā

kise milī koī ne.amat kise azaab huā

hazār log hue haiñ magar ziyāda der

batāo kaun sā jhūTā yahāñ janāb huā

saroñ ke taaj hue qaum ke chhupe rustam

bahut satāyā gayā jo khulī kitāb huā

tirī judā.ī ke din bhī bahut bure the magar

ġhamoñ kā chhoḌ ke jaanā bahut ḳharāb huā

haqīqatoñ kī haqīqat jo ho ga.ī mā'lūm

'azīz' dekh mirā rom-rom ḳhvāb huā

jo luT gaya to har ek saz dastiyab hua

bhaTak ke rah talashi to kaamyab hua

meri hi chashm se sairab wo sarab hua

main ho gaya koi kanTa to wo gulab hua

sawal karte zamane guzar gae mujh ko

sukut kar liya to phir wahi jawab hua

bhula ke KHud ko har ek dil hai dekhne mein laga

kise mili koi neamat kise azab hua

hazar log hue hain magar ziyaada der

batao kaun sa jhuTa yahan janab hua

saron ke taj hue qaum ke chhupe rustam

bahut sataya gaya jo khuli kitab hua

teri judai ke din bhi bahut bure the magar

ghamon ka chhoD ke jaana bahut KHarab hua

haqiqaton ki haqiqat jo ho gai ma'lum

'aziz' dekh mera rom-rom KHwab hua