jo maine kah diya us se mukarne wala nahin

jo maiñ ne kah diyā us se mukarne vaalā nahīñ

ki āsmān zamīñ par utarne vaalā nahīñ

maiñ reza reza huuñ lekin namī abhī tak hai

havā.eñ laakh chaleñ maiñ bikharne vaalā nahīñ

maiñ jāntā huuñ vo achchhe dinoñ kā sāthī hai

bure dinoñ meñ idhar se guzarne vaalā nahīñ

hamāre shahr meñ chehra nahīñ rahā shāyad

paḌe haiñ ā.ina-ḳhāne sañvarne vaalā nahīñ

tire karam kā sazā-vār maiñ huuñ yā dil hai

diyā hai tū ne vo kaasa jo bharne vaalā nahīñ

kahāñ kā ḳhvāb musāfir kī aañkh meñ 'āzim'

ki bahte paanī meñ manzar Thaharne vaalā nahīñ

jo main ne kah diya us se mukarne wala nahin

ki aasman zamin par utarne wala nahin

main reza reza hun lekin nami abhi tak hai

hawaen lakh chalen main bikharne wala nahin

main jaanta hun wo achchhe dinon ka sathi hai

bure dinon mein idhar se guzarne wala nahin

hamare shahr mein chehra nahin raha shayad

paDe hain aaina-KHane sanwarne wala nahin

tere karam ka saza-war main hun ya dil hai

diya hai tu ne wo kasa jo bharne wala nahin

kahan ka KHwab musafir ki aankh mein 'azim'

ki bahte pani mein manzar Thaharne wala nahin