jo meri haalat pe hans rahe hain mujhe kuchh un se gila nahin hai

jo merī hālat pe hans rahe haiñ mujhe kuchh un se gilā nahīñ hai

vo nā-samajh haiñ samajh rahe haiñ ki jaise merā ḳhudā nahīñ hai

ḳhulūs idhar bhī ho aur udhar bhī to dil se phir dil judā nahīñ hai

maiñ un ko chāhūñ vo mujh se rūTheñ kabhī to aisā huā nahīñ hai

jhukā.iye dil ko sar se pahle ki lutf hāsil ho zindagī kā

na ho agar ijz bandagī meñ to bandagī kā mazā nahīñ hai

burā.iyāñ hī burā.iyāñ haiñ burā.iyoñ kā jahāñ hai saarā

buroñ se dāman bachā.eñ kyuuñ kar buroñ ke dāman meñ kyā nahīñ hai

ye maiñ ne maanā ki zindagī meñ havādisāt-e-jahāñ bhī kuchh haiñ

magar hai mujh par karam bhī un kā nasīb merā burā nahīñ hai

nizām-e-duniyā badal hī degī use samajhnā nidā-e-ġhaibī

sadā-e-takbīr jo hamārī hai ye hamārī sadā nahīñ hai

gul-o-shajar par hai murdanī sī fazā pe chhāyā huā hai mātam

ye tujh ko kyā ho gayā hai bulbul jo aaj naġhma-sarā nahīñ hai

pata hī miltā nahīñ kuchh us kā hameñ to bāzār-e-zindagī meñ

to kyā jahān-e-ḳharāb meñ ab kahīñ bhī jins-e-vafā nahīñ hai

jahāñ se hai rābta jahāñ tak jahāñ hamārā jahāñ ke dam haiñ

ye kaise kah deñ ki zindagī meñ kisī se kuchh vāsta nahīñ hai

hujūm-e-isyāñ se kuchh nahīñ Dar samajh chukā huuñ ba-roz-e-mahshar

hai us kī rahmat kā saaya sar par to kyuuñ kahūñ aasrā nahīñ hai

jo aa hī baiThā hai aaj 'ḳhushtar' to ho ke jā.egā ḳhush se ḳhush-tar

tumhāre dar se uThe ye kyūñkar abhī to dāman bharā nahīñ hai

jo meri haalat pe hans rahe hain mujhe kuchh un se gila nahin hai

wo na-samajh hain samajh rahe hain ki jaise mera KHuda nahin hai

KHulus idhar bhi ho aur udhar bhi to dil se phir dil juda nahin hai

main un ko chahun wo mujh se ruThen kabhi to aisa hua nahin hai

jhukaiye dil ko sar se pahle ki lutf hasil ho zindagi ka

na ho agar ijz bandagi mein to bandagi ka maza nahin hai

buraiyan hi buraiyan hain buraiyon ka jahan hai sara

buron se daman bachaen kyun kar buron ke daman mein kya nahin hai

ye main ne mana ki zindagi mein hawadisat-e-jahan bhi kuchh hain

magar hai mujh par karam bhi un ka nasib mera bura nahin hai

nizam-e-duniya badal hi degi use samajhna nida-e-ghaibi

sada-e-takbir jo hamari hai ye hamari sada nahin hai

gul-o-shajar par hai murdani si faza pe chhaya hua hai matam

ye tujh ko kya ho gaya hai bulbul jo aaj naghma-sara nahin hai

pata hi milta nahin kuchh us ka hamein to bazar-e-zindagi mein

to kya jahan-e-KHarab mein ab kahin bhi jins-e-wafa nahin hai

jahan se hai rabta jahan tak jahan hamara jahan ke dam hain

ye kaise kah den ki zindagi mein kisi se kuchh wasta nahin hai

hujum-e-isyan se kuchh nahin Dar samajh chuka hun ba-roz-e-mahshar

hai us ki rahmat ka saya sar par to kyun kahun aasra nahin hai

jo aa hi baiTha hai aaj 'KHushtar' to ho ke jaega KHush se KHush-tar

tumhaare dar se uThe ye kyunkar abhi to daman bhara nahin hai