jo milte wo to itna puchhta main

jo milte vo to itnā pūchhtā maiñ

ki tum ho bevafā yā bevafā maiñ

ye hālat ho ga.ī marte hī mere

kabhī duniyā hī meñ goyā na thā maiñ

ḳhudā jaane vo samjhe yā na samjhe

ishāroñ meñ bahut kuchh kah gayā maiñ

musāfir ban ke āḳhir ye khulā raaz

huuñ manzil maiñ safar maiñ rahnumā maiñ

sar-e-manzil hamārā qāfila hai

kahāñ allāh jaane rah gayā maiñ

sunā hai mujh meñ ḳhud maujūd thā vo

ḳhabar hotī to ḳhud ko pūjtā maiñ

vo kahte haiñ ki ab baaqī rahā kyā

miTāyā tum ne dil ko dil meñ thā maiñ

zamāna DhūñDhtā hai mujh ko 'afsar'

ḳhudā jaane kahāñ kho gayā maiñ

jo milte wo to itna puchhta main

ki tum ho bewafa ya bewafa main

ye haalat ho gai marte hi mere

kabhi duniya hi mein goya na tha main

KHuda jaane wo samjhe ya na samjhe

ishaaron mein bahut kuchh kah gaya main

musafir ban ke aaKHir ye khula raaz

hun manzil main safar main rahnuma main

sar-e-manzil hamara qafila hai

kahan allah jaane rah gaya main

suna hai mujh mein KHud maujud tha wo

KHabar hoti to KHud ko pujta main

wo kahte hain ki ab baqi raha kya

miTaya tum ne dil ko dil mein tha main

zamana DhunDhta hai mujh ko 'afsar'

KHuda jaane kahan kho gaya main