jo mujhe marghub ho wo sogwari chahiye

jo mujhe marġhūb ho vo sogvārī chāhiye

mere soyam meñ tumheñ poshāk bhārī chāhiye

taaza ho bāġh-e-tamannā ābiyārī chāhiye

aaj to ai chashm-e-tar kuchh ashk-bārī chāhiye

jab bahār aa.e to kab parhez-gārī chāhiye

sāl-bhar meñ chaar din to bāda-ḳhvārī chāhiye

dil jigar se jab maiñ kahtā huuñ nahīñ aa.egā yaar

kahte haiñ kuchh der to aur intizārī chāhiye

hoñ havās-o-hosh agar baaqī to kyā lutf-e-junūñ

dil na qaabū meñ ho vo be-aḳhtyārī chāhiye

raas aa.e tum ko mulk-e-ishq kī āb-o-havā

āshiqo har-vaqt shaġhl-e-āh-o-zārī chāhiye

vasl kī shab hai vo pahlū meñ haiñ to sone na de

haañ mire dil ab ziyāda be-qarārī chāhiye

maut bekār aatī hai marnā hamārā hai muhāl

aap kī talvār kā ik zaḳhm kaarī chāhiye

rote rote mar ga.e haiñ jo firāq-e-yār meñ

un ko bahr-e-ġhusl mayyat āb-e-jārī chāhiye

sīkhī un se dilrubā.ī aa ga.ī fasl-e-shabāb

āj-kal dil kī taraf se hoshiyārī chāhiye

sar na uTThe terī chaukhaT se na kūche se qadam

tauq bhārī chāhiye zanjīr bhārī chāhiye

ho ziyāda raushnī aur der tak baaqī rahe

merī sham-e-rūh ko mahfil tumhārī chāhiye

aap ke lāo-ni.am ne turfa dikhlāyā tilism

nā-umīdī kahtī hai ummīd-vārī chāhiye

tere chehre ke muqābil ho agar to is tarah

āftāb-e-hashr ko ā.īna-dārī chāhiye

ye tumhārī jā nahīñ āñkhoñ ke vā se haiñ ye dar

dil meñ duuñ tum ko jagah ye parda-dārī chāhiye

baḳhsh detā hai 'rashīd' allāh itnī baat par

kar ke isyāñ aadmī ko sharmsārī chāhiye

jo mujhe marghub ho wo sogwari chahiye

mere soyam mein tumhein poshak bhaari chahiye

taza ho bagh-e-tamanna aabiyari chahiye

aaj to ai chashm-e-tar kuchh ashk-bari chahiye

jab bahaar aae to kab parhez-gari chahiye

sal-bhar mein chaar din to baada-KHwari chahiye

dil jigar se jab main kahta hun nahin aaega yar

kahte hain kuchh der to aur intizari chahiye

hon hawas-o-hosh agar baqi to kya lutf-e-junun

dil na qabu mein ho wo be-aKHtyari chahiye

ras aae tum ko mulk-e-ishq ki aab-o-hawa

aashiqo har-waqt shaghl-e-ah-o-zari chahiye

wasl ki shab hai wo pahlu mein hain to sone na de

han mere dil ab ziyaada be-qarari chahiye

maut bekar aati hai marna hamara hai muhaal

aap ki talwar ka ek zaKHm kari chahiye

rote rote mar gae hain jo firaq-e-yar mein

un ko bahr-e-ghusl mayyat aab-e-jari chahiye

sikhi un se dilrubai aa gai fasl-e-shabab

aaj-kal dil ki taraf se hoshiyari chahiye

sar na uTThe teri chaukhaT se na kuche se qadam

tauq bhaari chahiye zanjir bhaari chahiye

ho ziyaada raushni aur der tak baqi rahe

meri sham-e-ruh ko mahfil tumhaari chahiye

aap ke lao-niam ne turfa dikhlaya tilism

na-umidi kahti hai ummid-wari chahiye

tere chehre ke muqabil ho agar to is tarah

aaftab-e-hashr ko aaina-dari chahiye

ye tumhaari ja nahin aankhon ke wa se hain ye dar

dil mein dun tum ko jagah ye parda-dari chahiye

baKHsh deta hai 'rashid' allah itni baat par

kar ke isyan aadmi ko sharmsari chahiye