jo nahin mumkin kabhi mumkin wo hona chahiye

jo nahīñ mumkin kabhī mumkin vo honā chāhiye

vo nahīñ merā mujhe to us kā honā chāhiye

aur to kuchh bhī nahīñ lekin sukūn-e-qalb ko

maañ ke pahlū kī tarah kā ik bichhaunā chāhiye

merā yūsuf ġhaib meñ hai aur maiñ rotī nahīñ

hijr kā mujh se taqāza hai ki ronā chāhiye

is mohabbat kā asal is ke sivā kuchh bhī nahīñ

umr aisī hai ki tum ko ik khilaunā chāhiye

din sunahrā hai to apne aap se mil lo zarūr

shām-tā-shab to faqat takiya bhigonā chāhiye

aaj fursat hai to 'zehrā' faisla ab ḳhud karo

chain khoyā niiñd khoī ab kyā khonā chāhiye

jo nahin mumkin kabhi mumkin wo hona chahiye

wo nahin mera mujhe to us ka hona chahiye

aur to kuchh bhi nahin lekin sukun-e-qalb ko

man ke pahlu ki tarah ka ek bichhauna chahiye

mera yusuf ghaib mein hai aur main roti nahin

hijr ka mujh se taqaza hai ki rona chahiye

is mohabbat ka asal is ke siwa kuchh bhi nahin

umr aisi hai ki tum ko ek khilauna chahiye

din sunahra hai to apne aap se mil lo zarur

sham-ta-shab to faqat takiya bhigona chahiye

aaj fursat hai to 'zehra' faisla ab KHud karo

chain khoya nind khoi ab kya khona chahiye