jo naqsh-e-barg-e-karam Dal Dal hai us ka

jo naqsh-e-barg-e-karam Daal Daal hai us kā

to dasht aag ugaltā jalāl hai us kā

dayār-e-dīda-o-dil meñ maiñ sochtā huuñ use

ki is se aage tasavvur muhāl hai us kā

adhūrī baat hai zikr-e-muqīm-e-shahr-e-junūb

har ik musāfir-e-rāh-e-shumāl hai us kā

badan ke dasht meñ us kī hī guuñj hai har sū

javāb us ke haiñ har ik savāl hai us kā

usī kā hai ye bharā shahr dasht-e-ḳhālī bhī

ye bhiiḌ us kī hai qaht-ur-rijāl hai us kā

maiñ sochtā huuñ ki tasvīr-e-ḳhāk ko merī

hazār rañg meñ rañgnā kamāl hai us kā

vo aa.ina bhī 'hasan' us ke fan kā jaadū hai

ye chehra bhī hunar-e-lā-zavāl hai us kā

jo naqsh-e-barg-e-karam Dal Dal hai us ka

to dasht aag ugalta jalal hai us ka

dayar-e-dida-o-dil mein main sochta hun use

ki is se aage tasawwur muhaal hai us ka

adhuri baat hai zikr-e-muqim-e-shahr-e-junub

har ek musafir-e-rah-e-shumal hai us ka

badan ke dasht mein us ki hi gunj hai har su

jawab us ke hain har ek sawal hai us ka

usi ka hai ye bhara shahr dasht-e-KHali bhi

ye bhiD us ki hai qaht-ur-rijal hai us ka

main sochta hun ki taswir-e-KHak ko meri

hazar rang mein rangna kamal hai us ka

wo aaina bhi 'hasan' us ke fan ka jadu hai

ye chehra bhi hunar-e-la-zawal hai us ka