jo rabt meri teri nabz Dubne tak hai

jo rabt merī tirī nabz Dūbne tak hai

mubālaġha bhī kareñ to nibāhane tak hai

mirī hī ārzū-e-dil kā sho.abada hai tū

tirā vajūd faqat sehr TūTne tak hai

irāde kitnī hī umroñ ke bāñdh rakkhe haiñ

magar nigāh kī had apne sāmne tak hai

tire mizāj kī tabdīliyoñ se vāqif huuñ

ye mehrbānī mire hoñT kholne tak hai

girah-kushā kabhī sirr-e-jamāl tujh pe bhī ho

tirī rasā.ī magar ghar ke aa.ine tak hai

palaT ke aa.e na aa.e koī sune na sune

sadā kā kaam fazāoñ meñ gūñjte tak hai

vo ek baat jo afsāna ban ga.ī 'yāsir'

kisī kā husn sarāpā sarāhne tak hai

jo rabt meri teri nabz Dubne tak hai

mubaalagha bhi karen to nibahane tak hai

meri hi aarzu-e-dil ka shoabada hai tu

tera wajud faqat sehr TuTne tak hai

irade kitni hi umron ke bandh rakkhe hain

magar nigah ki had apne samne tak hai

tere mizaj ki tabdiliyon se waqif hun

ye mehrbani mere honT kholne tak hai

girah-kusha kabhi sirr-e-jamal tujh pe bhi ho

teri rasai magar ghar ke aaine tak hai

palaT ke aae na aae koi sune na sune

sada ka kaam fazaon mein gunjte tak hai

wo ek baat jo afsana ban gai 'yasir'

kisi ka husn sarapa sarahne tak hai