jo ruKH se parda uThao to koi baat bane

jo ruḳh se parda uThāo to koī baat bane

hameñ bhī jalva dikhāo to koī baat bane

hamāre sāmne aao to koī baat bane

hamāre hosh uḌaao to koī baat bane

sunā hai tuur pe muusā gire the sajde meñ

hameñ bhī sajda karāo to koī baat bane

ġhamoñ kī aag hai dil meñ jahān jaltā hai

zarā ye aag bujhāo to koī baat bane

ajiib Dhañg se toḌā hai dil mohabbat ne

ise bhī aas bañdhāo to koī baat bane

bahut udaas hai tārīk hai jahāñ merā

kahīñ se raushnī laao to koī baat bane

ḳhirad ke diip bujhe chaar sū añdherā hai

jalāo dil hī jalāo to koī baat bane

azal se naam sunā hai sharāb-e-vahdat kā

kabhī hameñ bhī pilāo to koī baat bane

yūñhī guzār dī jo zindagī to kyā hāsil

kisī ke kaam jo aao to koī baat bane

sunā hai ham ne dikhāte ho mo.ajaze aksar

maiñ gir gayā huuñ uThāo to koī baat bane

vo jis meñ naam tumhārā hamārā aatā hai

vahī fasāna sunāo to koī baat bane

tumhārā tark-e-mohabbat bhī nā-mukammal hai

ḳhayāl meñ bhī na aao to koī baat bane

fareb khaa.e haiñ 'hairat' tarah tarah ke magar

fareb-e-ishq bhī khaao to koī baat bane

jo ruKH se parda uThao to koi baat bane

hamein bhi jalwa dikhao to koi baat bane

hamare samne aao to koi baat bane

hamare hosh uDao to koi baat bane

suna hai tur pe musa gire the sajde mein

hamein bhi sajda karao to koi baat bane

ghamon ki aag hai dil mein jahan jalta hai

zara ye aag bujhao to koi baat bane

ajib Dhang se toDa hai dil mohabbat ne

ise bhi aas bandhao to koi baat bane

bahut udas hai tarik hai jahan mera

kahin se raushni lao to koi baat bane

KHirad ke dip bujhe chaar su andhera hai

jalao dil hi jalao to koi baat bane

azal se nam suna hai sharab-e-wahdat ka

kabhi hamein bhi pilao to koi baat bane

yunhi guzar di jo zindagi to kya hasil

kisi ke kaam jo aao to koi baat bane

suna hai hum ne dikhate ho moajaze aksar

main gir gaya hun uThao to koi baat bane

wo jis mein nam tumhaara hamara aata hai

wahi fasana sunao to koi baat bane

tumhaara tark-e-mohabbat bhi na-mukammal hai

KHayal mein bhi na aao to koi baat bane

fareb khae hain 'hairat' tarah tarah ke magar

fareb-e-ishq bhi khao to koi baat bane