jo sair-e-anjum-o-KHurshid ka irada kiya

jo sair-e-anjum-o-ḳhurshīd kā irāda kiyā

ġhubār raḳht-e-safar aur junūn jaada kiyā

bahut se kaam kiye haiñ tirī talab meñ magar

ye kār-e-dard zarūrat se kuchh ziyāda kiyā

fazā-e-hosh-o-ḳhirad meñ baḌā añdherā thā

so ham ne aañkh meñ raushan charāġh-e-bāda kiyā

baḌhā jo ġham kisī lamhe tirī judā.ī kā

to ham ne jaañ ke ziyāñ se bhī istifāda kiyā

vo rañg-e-husn bhī saada thā sāmne apne

so harf-e-arz-e-tamannā bhī ham ne saada kiyā

jo sair-e-anjum-o-KHurshid ka irada kiya

ghubar raKHt-e-safar aur junun jada kiya

bahut se kaam kiye hain teri talab mein magar

ye kar-e-dard zarurat se kuchh ziyaada kiya

faza-e-hosh-o-KHirad mein baDa andhera tha

so hum ne aankh mein raushan charagh-e-baada kiya

baDha jo gham kisi lamhe teri judai ka

to hum ne jaan ke ziyan se bhi istifada kiya

wo rang-e-husn bhi sada tha samne apne

so harf-e-arz-e-tamanna bhi hum ne sada kiya