jo samajhte the mar gaya hun main

jo samajhte the mar gayā huuñ maiñ

dekh leñ sab harā-bharā huuñ maiñ

apne Dar meñ hī mubtalā ho kar

apne andar chhupā huā huuñ maiñ

sun rahe haiñ sabhī tavajjoh se

terī bāteñ jo kar rahā huuñ maiñ

ai hasīñ shaḳhs ab tirī marzī

terī āñkhoñ pe mar chukā huuñ maiñ

maiñ bas ik kaam se milā thā use

vo samajhtī hai mubtalā huuñ maiñ

apnā nuqsān karne vaalā huuñ

āj-kal ḳhud se hī ḳhafā huuñ maiñ

mujh ko masrūfiyat hai daftar kī

vo samajhtā hai bevafā huuñ maiñ

maiñ vahī huuñ vahī 'saġhīr' ahmad

tere dil meñ kabhī rahā huuñ maiñ

jo samajhte the mar gaya hun main

dekh len sab hara-bhara hun main

apne Dar mein hi mubtala ho kar

apne andar chhupa hua hun main

sun rahe hain sabhi tawajjoh se

teri baaten jo kar raha hun main

ai hasin shaKHs ab teri marzi

teri aankhon pe mar chuka hun main

main bas ek kaam se mila tha use

wo samajhti hai mubtala hun main

apna nuqsan karne wala hun

aaj-kal KHud se hi KHafa hun main

mujh ko masrufiyat hai daftar ki

wo samajhta hai bewafa hun main

main wahi hun wahi 'saghir' ahmad

tere dil mein kabhi raha hun main