jo shab-e-siyah se Dar gae kisi sham hi mein bhaTak gae

jo shab-e-siyāh se Dar ga.e kisī shaam hī meñ bhaTak ga.e

vahī tājdār-e-sahar bane jo siyāhiyoñ meñ chamak ga.e

na banāyā muñh kisī jaam par na lagāyā dil kisī jaam se

jo laboñ tak aa.e vo pī liye jo chhalak ga.e vo chhalak ga.e

hai hayāt-e-jehd nafas nafas rah-e-āshiyāñ hai qafas qafas

jo na nok-e-ḳhār pe chal sake rah-e-zindagī se bhaTak ga.e

tujhe kuchh ḳhabar bhī hai mohtasib isī bazm meñ tire sāmne

laḌeñ duur hī se nigāheñ kabhī yuuñ bhī jaam khanak ga.e

mire rahnumā-e-suḳhan-sarā kabhī mimbaroñ se utar zarā

koī gaam rāh-e-amal meñ bhī tirī guftugū se to thak ga.e

haiñ na jaane kitne gul-e-hasīñ jo chhupā.e āriz-e-ātishīñ

liye apnā sāġhar-e-ambarīñ kisī dasht hī meñ mahak ga.e

kahūñ kyā maiñ ziist kī dāstāñ use yuuñ samajh mire mehrbāñ

kabhī harf-e-bazm jo sun liyā to nazar ke jaam chhalak ga.e

rah-e-ilm shak kī haiñ sīḌhiyāñ yahī zehn zinda kā hai nishāñ

jise iḳhtilāf meñ ho gumāñ vo hamīñ na hoñ jo bahak ga.e

na nazar milī na zabāñ khulī chhupī phir bhī dil kī na bekalī

kabhī duur jā ke palaT paḌe kabhī paas jā ke ThiThuk ga.e

chalī bād-e-jabr agar to kyā mujhe yuuñ jahāñ na bujhā sakā

mujhe raas aa.ī yahī huā mirā sho.ale aur bhaḌak ga.e

mire zehn-o-dil kī basīrateñ ġham-e-zindagī kī haqīqateñ

mire lab pe giit nahīñ haiñ vo ki jo pāyaloñ meñ chhanak ga.e

suneñ bām-o-hosh pe jā ke kyuuñ tirī 'mullā' āyat-e-be-maza

abhī koī ishq meñ raat ko vo ġhazal sunī ki phaḌak ga.e

jo shab-e-siyah se Dar gae kisi sham hi mein bhaTak gae

wahi tajdar-e-sahar bane jo siyahiyon mein chamak gae

na banaya munh kisi jam par na lagaya dil kisi jam se

jo labon tak aae wo pi liye jo chhalak gae wo chhalak gae

hai hayat-e-jehd nafas nafas rah-e-ashiyan hai qafas qafas

jo na nok-e-KHar pe chal sake rah-e-zindagi se bhaTak gae

tujhe kuchh KHabar bhi hai mohtasib isi bazm mein tere samne

laDen dur hi se nigahen kabhi yun bhi jam khanak gae

mere rahnuma-e-suKHan-sara kabhi mimbaron se utar zara

koi gam rah-e-amal mein bhi teri guftugu se to thak gae

hain na jaane kitne gul-e-hasin jo chhupae aariz-e-atishin

liye apna saghar-e-ambarin kisi dasht hi mein mahak gae

kahun kya main zist ki dastan use yun samajh mere mehrban

kabhi harf-e-bazm jo sun liya to nazar ke jam chhalak gae

rah-e-ilm shak ki hain siDhiyan yahi zehn zinda ka hai nishan

jise iKHtilaf mein ho guman wo hamin na hon jo bahak gae

na nazar mili na zaban khuli chhupi phir bhi dil ki na bekali

kabhi dur ja ke palaT paDe kabhi pas ja ke ThiThuk gae

chali baad-e-jabr agar to kya mujhe yun jahan na bujha saka

mujhe ras aai yahi hua mera shoale aur bhaDak gae

mere zehn-o-dil ki basiraten gham-e-zindagi ki haqiqaten

mere lab pe git nahin hain wo ki jo payalon mein chhanak gae

sunen baam-o-hosh pe ja ke kyun teri 'mulla' aayat-e-be-maza

abhi koi ishq mein raat ko wo ghazal suni ki phaDak gae