jo shaKHs aab-o-hawa par yaqin rakhta hai

jo shaḳhs āb-o-havā par yaqīn rakhtā hai

vo mausamoñ kī atā par yaqīn rakhtā hai

tamām umr mohabbat nahīñ milī jis ko

sunā hai vo bhī ḳhudā par yaqīn rakhtā hai

charāġh us kā kabhī bhī jalā nahīñ lekin

vo aaj tak bhī duā par yaqīn rakhtā hai

hamesha TuuT ke aatā hai mere pahlū meñ

vo bevafā bhī vafā par yaqīn rakhtā hai

koī ġharaz nahīñ us ko kisī saḳhāvat se

faqīr apnī sadā par yaqīn rakhtā

hazār us ko sahāre mileñ magar 'sāhil'

nā-bīnā apne asā par yaqīn rakhtā hai

jo shaKHs aab-o-hawa par yaqin rakhta hai

wo mausamon ki ata par yaqin rakhta hai

tamam umr mohabbat nahin mili jis ko

suna hai wo bhi KHuda par yaqin rakhta hai

charagh us ka kabhi bhi jala nahin lekin

wo aaj tak bhi dua par yaqin rakhta hai

hamesha TuT ke aata hai mere pahlu mein

wo bewafa bhi wafa par yaqin rakhta hai

koi gharaz nahin us ko kisi saKHawat se

faqir apni sada par yaqin rakhta

hazar us ko sahaare milen magar 'sahil'

na-bina apne asa par yaqin rakhta hai