jo shaKHs bhi mila hai wo ek zinda lash hai

jo shaḳhs bhī milā hai vo ik zinda laash hai

insāñ kī dāstān baḌī dil-ḳharāsh hai

dāman darīda qalb-o-nazar zaḳhm zaḳhm haiñ

ab shahr-e-ārzū meñ yahī būd-o-bāsh hai

bas ab to rah ga.ī hai dikhāve kī zindagī

sāñsoñ ke taar taar meñ ek irti.āsh hai

miTTī ne pī liyā hai harārat bharā lahū

josh-e-numū milā to badan qaash qaash hai

kāñToñ ne bhī ḳhizāñ kī ġhulāmī qubūl kī

dekho to aaj chehra-e-gul pur-ḳharāsh hai

vo daur ab kahāñ ki tumhārī ho justujū

is daur meñ to ham ko ḳhud apnī talāsh hai

'afzal' vo ban sañvar ke to aa jā.eñge kabhī

ā.īna-e-hayāt magar paash paash hai

jo shaKHs bhi mila hai wo ek zinda lash hai

insan ki dastan baDi dil-KHarash hai

daman darida qalb-o-nazar zaKHm zaKHm hain

ab shahr-e-arzu mein yahi bud-o-bash hai

bas ab to rah gai hai dikhawe ki zindagi

sanson ke tar tar mein ek irtiash hai

miTTi ne pi liya hai hararat bhara lahu

josh-e-numu mila to badan qash qash hai

kanTon ne bhi KHizan ki ghulami qubul ki

dekho to aaj chehra-e-gul pur-KHarash hai

wo daur ab kahan ki tumhaari ho justuju

is daur mein to hum ko KHud apni talash hai

'afzal' wo ban sanwar ke to aa jaenge kabhi

aaina-e-hayat magar pash pash hai