jo shaKHs muddaton mere shaidaiyon mein tha

jo shaḳhs muddatoñ mire shaidā.iyoñ meñ thā

aafat ke vaqt vo bhī tamāshā.iyoñ meñ thā

us kā ilaaj koī masīhā na kar sakā

jo zaḳhm merī ruuh kī gahrā.iyoñ meñ thā

vo the bahut qarīb to thī garmi-e-hayāt

shola hujūm-e-shauq kā purvā.iyoñ meñ thā

koī bhī saaz un kī taḌap ko na pā sakā

vo soz vo gudāz jo shahnā.iyoñ meñ thā

bazm-e-tasavvurāt meñ yādoñ kī raushnī

aalam ajiib raat kī tanhā.iyoñ meñ thā

us bazm meñ chhiḌī jo kabhī jāñ-dahī kī baat

us dam hamārā zikr bhī saudā.iyoñ meñ thā

kuchh vaz-e-ehtiyāt se 'bāno' the ham bhī duur

kuchh dostoñ kā haath bhī rusvā.iyoñ meñ thā

jo shaKHs muddaton mere shaidaiyon mein tha

aafat ke waqt wo bhi tamashaiyon mein tha

us ka ilaj koi masiha na kar saka

jo zaKHm meri ruh ki gahraiyon mein tha

wo the bahut qarib to thi garmi-e-hayat

shola hujum-e-shauq ka purwaiyon mein tha

koi bhi saz un ki taDap ko na pa saka

wo soz wo gudaz jo shahnaiyon mein tha

bazm-e-tasawwuraat mein yaadon ki raushni

aalam ajib raat ki tanhaiyon mein tha

us bazm mein chhiDi jo kabhi jaan-dahi ki baat

us dam hamara zikr bhi saudaiyon mein tha

kuchh waz-e-ehtiyat se 'bano' the hum bhi dur

kuchh doston ka hath bhi ruswaiyon mein tha