jo sikhana hai to phir is Dhang ki baaten sikha

jo sikhānā hai to phir is Dhang kī bāteñ sikhā

kar luuñ sab ke dil meñ ghar aisī munājāteñ sikhā

mujh ko tanhā karne se pahle ai mere ham-nafas

kaise kāTūñgā maiñ tere hijr kī rāteñ sikhā

duur se dīdār kī bas puurī hoñgī hasrateñ

jo banā deñ āshnā aisī mulāqāteñ sikhā

apne shauq-e-girya se mausam-zada bādal ko tū

kaise be-mausam huā kartī haiñ barsāteñ sikhā

raat ko din karne vaale ai mire shātir aziiz

jaise tū chaltā hai yuuñ chalnā mujhe ghāteñ sikhā

vird ne jin ke tujhe ḳhushiyāñ hī ḳhushiyāñ baḳhshī haiñ

mujh ko bhī paḌhnā mohabbat kī vo āyāteñ sikhā

dard-e-dil āñkhoñ meñ aañsū aur tabassum pyaar meñ

kaise dī jaatī haiñ ye anmol sauġhāteñ sikhā

maiñ bhī me.arāj-e-mohabbat chāhtā huuñ jān-e-man

mujh ko andāz-e-mohabbat kī hidāyāteñ sikhā

ishq se nā-āshnā huuñ tere jalvoñ kī qasam

aa ke apne husn-e-dilkash kī mudārāteñ sikhā

jo sikhana hai to phir is Dhang ki baaten sikha

kar lun sab ke dil mein ghar aisi munajaten sikha

mujh ko tanha karne se pahle ai mere ham-nafas

kaise kaTunga main tere hijr ki raaten sikha

dur se didar ki bas puri hongi hasraten

jo bana den aashna aisi mulaqaten sikha

apne shauq-e-girya se mausam-zada baadal ko tu

kaise be-mausam hua karti hain barsaten sikha

raat ko din karne wale ai mere shatir aziz

jaise tu chalta hai yun chalna mujhe ghaten sikha

wird ne jin ke tujhe KHushiyan hi KHushiyan baKHshi hain

mujh ko bhi paDhna mohabbat ki wo aayaten sikha

dard-e-dil aankhon mein aansu aur tabassum pyar mein

kaise di jati hain ye anmol saughaten sikha

main bhi mearaj-e-mohabbat chahta hun jaan-e-man

mujh ko andaz-e-mohabbat ki hidayaten sikha

ishq se na-ashna hun tere jalwon ki qasam

aa ke apne husn-e-dilkash ki mudaraaten sikha