jo surat dekh li us mah-laqa ki

jo sūrat dekh lī us mah-laqā kī

nazar aa.ī mujhe qudrat ḳhudā kī

abhī qabroñ se murde uTh khaḌe hoñ

suneñ āvāz gar raftār-e-pā kī

mirā dil le ke mujh se phir gayā hai

vafā ke badle zālim ne daġhā kī

kiye jaate ho mujh se be-vafā.ī

zabāñ merī nahīñ ab tak hai shākī

hazāroñ ġhair ko dete ho bose

liyā gar ek maiñ ne kyā ḳhatā kī

kiye jaatā hai jaur-o-zulm mujh par

kuchh āḳhir intihā bhī hai jafā kī

mujhe kaafī hai terā sāya-e-zulf

nahīñ ḳhvāhish hai kuchh zill-e-humā kī

na aaya par na aaya vo sitamgar

ḳhushāmad kī bahut kuchh iltijā kī

tumhāre āb-e-‘ḳhanjar’ kā huuñ pyāsā

nahīñ hai aarzū āb-e-baqā kī

jo surat dekh li us mah-laqa ki

nazar aai mujhe qudrat KHuda ki

abhi qabron se murde uTh khaDe hon

sunen aawaz gar raftar-e-pa ki

mera dil le ke mujh se phir gaya hai

wafa ke badle zalim ne dagha ki

kiye jate ho mujh se be-wafai

zaban meri nahin ab tak hai shaki

hazaron ghair ko dete ho bose

liya gar ek main ne kya KHata ki

kiye jata hai jaur-o-zulm mujh par

kuchh aaKHir intiha bhi hai jafa ki

mujhe kafi hai tera saya-e-zulf

nahin KHwahish hai kuchh zill-e-huma ki

na aaya par na aaya wo sitamgar

KHushamad ki bahut kuchh iltija ki

tumhaare aab-e-‘KHanjar’ ka hun pyasa

nahin hai aarzu aab-e-baqa ki