jo tasawwur mein hai usko koi kya raushan kare

jo tasavvur meñ hai us ko koī kyā raushan kare

aks-e-gum-gashta ko kaise ā.īna raushan kare

ham girāñ-goshoñ meñ harf-e-mo'tabar kahne ko haiñ

dekhiye kis kī samā.at ye sadā raushan kare

Duub jaa.e jab kabhī tārīkiyoñ meñ raushnī

ik diyā siine meñ phir us kī navā raushan kare

muntazir haiñ sab havā ke chāñd chehre aur charāg

dekhiye ye kyā bujhā de aur kyā raushan kare

āsmāñ ko chūmte shahroñ meñ fursat hai kise

is khañDar meñ kaun ye bujhtā diyā raushan kare

dhīre dhīre bujh ga.ī jitnī diloñ meñ aag thī

ab yahāñ kyā hai jise dast-e-duā raushan kare

raat ke jañgal meñ maiñ huuñ aur tirī mub.ham sī yaad

ik diyā hai ye kahāñ tak rāsta raushan kare

jo tasawwur mein hai us ko koi kya raushan kare

aks-e-gum-gashta ko kaise aaina raushan kare

hum giran-goshon mein harf-e-mo'tabar kahne ko hain

dekhiye kis ki samaat ye sada raushan kare

Dub jae jab kabhi tarikiyon mein raushni

ek diya sine mein phir us ki nawa raushan kare

muntazir hain sab hawa ke chand chehre aur charag

dekhiye ye kya bujha de aur kya raushan kare

aasman ko chumte shahron mein fursat hai kise

is khanDar mein kaun ye bujhta diya raushan kare

dhire dhire bujh gai jitni dilon mein aag thi

ab yahan kya hai jise dast-e-dua raushan kare

raat ke jangal mein main hun aur teri mubham si yaad

ek diya hai ye kahan tak rasta raushan kare